Revanth Reddy : బీజేపీ ట్రాప్ లో రేవంత్ ...ఇరకాటంలో పడినట్లేగా

బీఆర్ఎస్ వర్కింగ్ ప్రెసిడెంట్ కేటీఆర్ విచారణకు గవర్నర్ ఆమోదం తెలిపారు. ఫార్ములా ఈ కారు రేసు కేసులో ఇప్పటికే అవినీతి నిరోధక శాఖ అధికారులు కేసు నమోదు చేశారు. పలుమార్లు కేటీఆర్ ను విచారించారు. ఫార్ములా ఈ కారు రేసు వ్యవహారంలో 54 కోట్ల రూపాయలు చేతులు మారాయన్న ఆరోపణలపై కాంగ్రెస్ ప్రభుత్వం ఏసీబీ విచారణకు ఆదేశించింది. అయితే ప్రజాప్రతినిధి కావడంతో కేటీఆర్ విచారణకు అనుమతివ్వాలని అవినీతి నిరోధక శాఖ గవర్నర్ ను కోరింది. నేడు గవర్నర్ కేటీఆర్ విచారణకు అనుమతివ్వడంతో కేటీఆర్ ను విచారించిన తర్వాత ఛార్జిషీట్ దాఖలు చేసే అవకాశముంది. ఫార్ములా ఈ కారు రేసులో త్వరలోనే ప్రాసిక్యూషన్ చేయనున్నారు.

గవర్నర్ అనుమతి ఇవ్వలేదంటూ పలు మార్లు ముఖ్యమంత్రి రేవంత్ రెడ్డి వ్యాఖ్యానించారు. అంటే తప్పిదాన్ని రాజ్ భవన్ పై నెట్టే ప్రయత్నం చేశారు. ఒకరకంగా బీజేపీని కార్నర్ చేసేందుకు ప్రయత్నించారు. గవర్నర్ నుంచి అనుమతి రావడంతో ఏసీబీ ఛార్జిషీట్ దాఖలు చేసి న్యాయస్థానంలో విచారణ చేపట్టాల్సి ఉంది. న్యాయస్థానంలో ఈ కేసును పెట్టి కోర్టు ఆదేశాల మేరకు నడచుకోవాల్సి ఉంటుంది.తాను జైలుకు వెళ్లడానికి సిద్ధమని కేటీఆర్ ఎప్పటి నుంచో ప్రకటిస్తున్నారు. కానీ జైలుకు పంపితే రాజకీయ కక్ష సాధింపు చర్యగా బీఆర్ఎస్ ప్రజల్లోకి వెళ్లి సానుభూతి పొందే అవకాశముంది. ఈ నేపథ్యంలో గవర్నర్ ఆమోదంతో రేవంత్ ప్రభుత్వం ఒకింత ఇరకాటంలో పడినట్లయిందన్న కామెంట్స్ వినపడుతున్నాయి.