SLBC Accident : ఆ ఏడు మృతదేహాలు ఎక్కడ.. ఇంత వరకూ జాడ లేక

తాము ఎన్ని చర్యలు చేపడుతున్నప్పటీకి అర మీటర్ దూరంలో ప్రమాదకరమైన పరిస్థితులున్నాయని సహాయక బృందాలు చెబుతున్నాయి. అందుకే కేరళ నుంచి తెప్పించిన జాగిలాలతో మృతదేహాల జాడను కనుక్కునే ప్రయత్నం చేస్తున్నారు. ఇక మానవ ప్రయత్నం కంటే రోబోలతోనే సాధ్యమని నమ్మి నేడు రోబోల సహకారంతో మృతదేహాలను వెలికి తీసే ప్రయత్నం చేస్తున్నారు. రోబోలయితే ప్రాణ నష్టం జరగకుండా సహాయక చర్యలు చేపట్టవచ్చన్న ముఖ్యమంత్రి రేవంత్ రెడ్డి సూచనలతో ప్రత్యేకంగా హైదరాబాద్ నుంచి రోబోలను తెప్పించారు. వాటి సహకారంతో మృతదేహాలను వెలికి తీయాలని నేడు సహాయక బృందాలు ప్రయత్నిస్తున్నాయి.

ఇప్పటి వరకూ గురుప్రీత్ సింగ్ మృతదేహం ఒక్కటే లభ్యం కావడంతో మిగిలిన ఏడు మృతదేహాల కోసం అన్వేషణ కొనసాగుతుంది. ఆ మృతదేహాలు ఎక్కడ ఉన్నాయన్నది కూడా తెలియడం లేదు. లోపలకి వెళ్లి మానవ ప్రయత్నం చేయాలంటే సాధ్యపడటం లేదు. అందుకే రోబోలను ఉపయోగించి కొంత వరకైనా పురోగతిని సాధించే అవకాశముందన్న నమ్మకంతో సహాయక బృందాలున్నాయి. ఈ సహాయక చర్యల్లో మొత్తం పదకొండు బృందాలు షిఫ్ట్ ల వారీగా పాల్గొంటున్నాయి. అయితే రోబోలు ఎంత వరకూ పనిచేస్తాయన్నది మాత్రం ఇంతవరకూ తేలలేదు. ఇది చివరి ప్రయత్నంగానే చూడాలని ఉన్నతాధికారులు చెబుతున్నారు. తాము ఎన్ని ప్రయత్నాలు చేసినా లోపలి పరిస్థితులు ఆటంకంగా మారాయంటున్నారు.