Raja Singh : ఏం చేస్తారో చేస్కోండి.. అంటూ సవాల్ విసిరిన రాజాసింగ్

మూడోసారి బీజేపీ ఎమ్మెల్యేగా ఎన్నికయిన తనకు పార్టీలో సరైన గౌరవం దక్కలేదని ఆయన మరోసారి పార్టీ రాష్ట్ర నాయకత్వంపై అక్కసు వెళ్లగక్కారు. కార్యకర్తలుగా పనిచేసే వారికి పదవులు ఇవ్వాలని తాను కోరడం తప్పా? అని రాజాసింగ్ ప్రశ్నించారు. ఢిల్లీ నుంచి తాను పిలుపు కోసం ఎదురు చూస్తున్నానని, నాయకత్వం పిలిచి మాట్లాడితే రాష్ట్రంలో జరుగుతున్న అన్ని విషయాలను చెబుతానని రాజాసింగ్ తెలిపారు. తెలంగాణలో ప్రస్తుతం ఉన్న కమిటీతో మాత్రం వచ్చే ఎన్నికల్లో అధికారంలోకి రాదని తేల్చి చెప్పి మరోసారి రాష్ట్ర బీజేపీ నేతలకు ఇబ్బందిగా మారారు. తెలంగాణలో కొందరు నేతలు బీజేపీని నాశనం చేస్తున్నారని రాజాసింగ్ అన్నారు. పార్టీతో తనకున్న అనుబంధాన్ని ఎవరూ విడదీయలేరన్నారు.

తనను నాలుగోసారి కూడా గోషా మహల్ ప్రజలు ఎమ్మెల్యేగా గెలిపిస్తారని రాజాసింగ్ విశ్వాసం వ్యక్తం చేశారు. తాను ఎమ్మెల్యే పదవికి మాత్రం రాజీనామా చేసే ప్రసక్తి లేదని రాజాసింగ్ తెలిపారు. ఏం చేస్తారో చేసుకోమని సవాల్ విసిరారు. పార్టీ కోసం కార్యకర్తలు పనిచేయడానికి సిద్ధంగా లేరన్న విషయాన్ని గుర్తుంచుకోవాలని అన్నారు. దీంతో రాజాసింగ్ పార్టీ నుంచి సస్పెండ్ అయిన తర్వాత కూడా గీత దాటారని బీజేపీ నేతలు భావిస్తున్నారు. ఆయన ఎమ్మెల్యే పదవి విషయంలో బీజేపీ నాయకత్వం ఎటువంటి నిర్ణయం తీసుకోకపోవడంతో రాజాసింగ్ తన ధోరణని మార్చుకునే అవకాశం లేదని చెబుతున్నారు. దీంతో రాజాసింగ్ కమలనాధులకు తలనొప్పిగా తయారయ్యే అవకాశాలు స్పష్టంగా కనిపిస్తున్నాయి. ఆయనను కంట్రోల్ చేయడానికి ఇప్పుడు పార్టీలో కూడా లేకపోవడంతో రాష్ట్ర బీజేపీ నేతలు హస్తిన వైపు చూస్తున్నారట.