మంత్రి హరీష్ రావు చెత్తోపదేశం

పట్టణంలోని 18వ వార్డులో వెంకటేశ్వర కళామందిర్ థియేటర్ నుంచి నడుస్తూ చెత్త ఏరివేత కార్యక్రమంలో మంత్రి హరీశ్ రావు పాల్గొన్నారు. మురికి కాలువలో పేరుకుపోయిన పేపర్లు, కవర్లను ఆయనే స్వయంగా తొలగించారు. వ్యక్తిగత పరిశుభ్రతతో పాటు పరిసరాల పరిశుభ్రత పాటించాలని ప్రజలను కోరారు. మన చెత్త - మన బాధ్యత అంటూ పలు గృహిణులకు చెత్త పెరుకుపోతే కలిగే అనర్థాలపై అవగాహన కల్పించారు. ఇంటి పరిసరాలు పరిశుభ్రంగా ఉంటేనే ఆరోగ్యవంతమైన కుటుంబం, సమాజం సాధ్యమవుతుందని హితవు పలికారు. చెత్తపేరుకుపోతే.. వర్షాకాలంలో అంటువ్యాధులు వేగంగా వ్యాప్తిచెందే ప్రమాదం ఉందని.. అలాగే నీటినిల్వలతో దోమలు కూడా పెరిగిపోతాయని.. తద్వారా డెంగ్యూ, మలేరియా వంటి ప్రాణాంతక వ్యాధులు వ్యాపిస్తాయన్నారు. పరిసరాలను ఎప్పటికప్పుడు శుభ్రంగా ఉంచుకోవడం అందరి బాధ్యత అని మంత్రి హరీష్ రావు ఉపదేశించారు.