Weather Report : మరో రెండు రోజులు చలితీవ్రత తప్పదట

ఆంధ్రప్రదేశ్ లో చలి తీవ్రత ఎక్కువవుతుంది. అయితే నేడు కూడా వానలు పడతాయని అమరావతి వాతావరణ శాఖ వెల్లడించింది. రాయలసీమ, కోస్తాంధ్రలో తేలికపాటి నుంచి మోస్తరు వానలు పడతాయని తెలిపింది. ప్రధానంగా ఈరోజు కృష్ణా, ప్రకాశం, బాపట్ల, నెల్లూరు, శ్రీసత్యసాయి, అన్నమయ్య జిల్లాల్లో కొన్నిచోట్ల తేలికపాటి వానలు పడతాయని వాతావరణ శాఖ అధికారులు తెలిపారు. చిత్తూరు, తిరుపతి జిల్లాల్లో కూడా అక్కడక్కడ తేలికపాటి వానలు పడతాయని తెలిపింది. ఇక సాధారణం కంటే రెండు నుంచి మూడు డిగ్రీల ఉష్ణోగ్రతలు తక్కువగా ఉష్ణోగ్రతలు నమోదయ్యే అవకాశాలున్నాయని వాతావరణ శాఖ వెల్లడించింది. ప్రజలు అప్రమత్తంగా ఉండాలని సూచించింది.

తెలంగాణలో రానున్న రోజుల్లో మరింతగా కనిష్ట ఉష్ణోగ్రతలు నమోదవుతాయని వాతావరణ శాఖ వెల్లడించింది. గత నెల రోజుల నుంచి తెలంగాణలో చలిగాలుల తీవ్రత ఎక్కువగా ఉంది. వాస్తవం చెప్పాలంటే డిసెంబరు నెల మొత్తం తెలంగాణ చలిగుప్పిట్లోనే చిక్కుకుంది. అత్యల్ప ఉష్ణోగ్రతలు నమోదవుతున్నాయి. సింగిల్ డిజిట్ ఉష్ణోగ్రతలు తెలంగాణలో నమోదవుతుండటంతో జనం గత నెల రోజుల నుంచి అల్లాడిపోతున్నారు. విద్యుత్తు వినియోగం కూడా గణనీయంగా తగ్గిపోయింది. వచ్చే రెండు రోజుల్లో సాధారణం కంటే రెండు నుంచి మూడు డిగ్రీల ఉష్ణోగ్రతలు తక్కువగా నమోదయ్యే అవకాశాలున్నయని హైదరాబాద్ వాతావరణ శాఖ వెల్లడించింది. జనగాం, జగిత్యాల, హైదరాబాద్, వికారాబాద్, రంగారెడ్డి, వరంగల్, హనుమకొండ, ఆదిలాబాద్, కుమ్రంభీం ఆసిఫాబాద్, నిర్మల్ జిల్లాలకు ఎల్లో అలర్ట్ జారీ అయింది.