Weather Report : మంచులా మారిపోతున్న రాష్ట్రాలు... ఎప్పటికి వేడెక్కేను గురూ?

ఆంధ్రప్రదేశ్ లో సముద్రతీర ప్రాంతం ఎక్కువ కావడంతో సహజంగా ఉక్కపోత వాతావరణం ఎక్కువగా ఉంటుంది. ఎప్పుడైనా తుపానులు, అల్పపీడనాల సమయంలోనే కొంచెం చలి అని అనిపిస్తుంది. అదీ దుప్పట్లు కప్పుకునే చలి కాదు. కానీ నేడు చలిగాలుల తీవ్రతకు బయటకు రావడానికి ప్రజలు భయపడిపోతున్నారు. ఉదయం, సాయంత్రం వేళల్లోనూ చలితీవ్రత ఎక్కువగా ఉంటుంది. ముఖ్యంగా అల్లూరి సీతారామరాజు, పార్వతీపురం జిల్లాల్లో ఐదు నుంచి ఆరు డిగ్రీల ఉష్ణోగ్రతలు నమోదవుతున్నాయి. ఇక అరకు వంటి ప్రాంతాలకు పర్యాటకుల సంఖ్య మరింత పెరుగుతుంది. చలిని ఎంజాయ్ చేయడానికి అధిక సంఖ్యలో పర్యాటకులు తరలి వస్తున్నారు.

తెలంగాణలో ఇక వేరే చెప్పాల్సిన పనిలేదు. తెలంగాణలోని అన్ని ప్రాంతాలు చలిగుప్పిట్లో మగ్గుతున్నాయి. ఇంకా ఎన్ని రోజులు ఈ చలితీవ్రత ఉంటుందో తెలియదు. కానీ జనవరి నెల వరకూ చలి ఉంటుందని వాతావరణ శాఖ అధికారులు చెబుతున్నారు. హైదరాబాద్ వాతావరణ శాఖ వెల్లడించిన ప్రకారం ఆదిలాబాద్, కొమ్రంభీం ఆసిఫాబాద్, మెదక్, సంగారెడ్డి, హైదరాబాద్, నల్లగొండ వంటి ప్రాంతాల్లో చలితీవ్రత ఎక్కువగా కనపడుతుంది. మహబూబ్ నగర్ జిల్లాలోనూ అధికంగానే ఉంది. ఇక ఉష్ణోగ్రతలు గణనీయంగా పడిపోవడంతో భారీగా విద్యుత్తు వినియోగం పడిపోయింది. హైదరాబాద్ లో ఏడు డిగ్రీలకు ఉష్ణోగ్రతలు పడిపోయాయని చెబుతున్నారు. ప్రజలు అప్రమత్తంగా ఉండాలని సూచిస్తున్నారు.