Weather Report : వానలు ఆగవట.. మరో నాలుగు రోజులు పడతాయి కానీ?

తెలంగాణలో ఈ నెల 12వ తేదీ వరకూ వర్షాలు పడతాయని హైదరాబాద్ వాతావరణ కేంద్రం తెలిపింది. తేలికపాటి నుంచి మోస్తరు వర్షాలు పడతాయని చెప్పింది. కొన్నిజిల్లాలకు ఎల్లో అలెర్ట్ జారీ చేసింది. ఈరోజు తెలంగాణ రాష్ట్రంలోని యాదాద్రి భువనగిరి, వరంగల్, వికారాబాద్, సిద్ధిపేట, సంగారెడ్డి, రంగారెడ్డి, రాజన్న సిరిసిల్ల, పెద్దపల్లి, నిజామాబాద్, నిర్మల్, ములుగు, మేడ్చల్ మల్కాజ్ గిరి, మెదక్, మంచిర్యాల, మహబూబాబాద్, కొమ్రంభీం ఆసిఫాబాద్, ఖమ్మం,కరీంనగర్, కామారెడ్డి, జయశంకర్ భూపాలపల్లి, జనగాం, జగిత్యాల, హైదరాబాద్ జిల్లాలో బలమైన ఈదురుగాలులతో కూడిన వర్షం పడుతుందని హైదరాబాద్ వాతావరణ శాఖ హెచ్చరించింది.

ఆంధ్రప్రదేశ్ లోనూ మరో నాలుగు రోజుల పాటు వర్షాలు పడతాయని విశాఖ వాతావరణ శాఖ తెలిపింది. ఉత్తర కోస్తాంధ్రలో తేలికపాటి నుంచి మోస్తరు వర్షాలు లేదా ఉరుములతో కూడిన తేలికపాటి జల్లులు పడే అవకాశముందని చెప్పింది. గంటకు ముప్ఫయి నుంచి నలభై కిలోమీటర్ల వేగంతో ఈదురుగాలులు వీస్తాయని పేర్కొంది. దక్షిణ కోస్తా జిల్లాల్లో తేలిక పాటినుంచి మోస్తరు వర్షాలు పడతాయని వాతావరణ శాఖ చెప్పింది. కొన్నిచోట్ల బలమైన ఈదురుగాలులు వీస్తాయని చెప్పింది. రాయలసీమలోనూ బలమైన గాలులతో కూడిన వర్షం పడుతుందని వాతావరణ శాఖ హెచ్చరించింది. కొన్ని ప్రాంతాల్లో పిడుగులు పడే అవకాశముందని కూడా హెచ్చరించింది.