Rain Alert : 24వ తేదీ వరకూ జోరు వానలు తప్పవు.. ఎల్లో అలెర్ట్ జారీ చేసిన వాతావరణ శాఖ

ఆంధ్రప్రదేశ్, తెలంగాణలలో వానలు విస్తారంగా కురుస్తాయని వాతావరణ కేంద్రం తెలిపింది. పలు జిల్లాలకు ఎల్లో అలెర్ట్ జారీ చేసింది. కొన్ని జిల్లాల్లో ఉరుములు, మెరుపులతో కూడిన వర్షం పడుతుందని వాతావరణ కేంద్రం అధికారులు తెలిపారు. తేలిక పాటి నుంచి మోస్తరు వర్షాలు పడతాయని, అదే సమయంలో తెలగాణలో ఉష్ణోగ్రతలు కనిష్టంగా నమోదవుతాయని, ఆంధ్రప్రదేశ్ లో మాత్రం గరిష్టంగానే ఉంటాయని చెప్పింది. తెలంగాణలో ముప్పయి డిగ్రీలకు లోపు ఉష్ణోగ్రతలు నమోదవుతాయని, ఆంధ్రప్రదేశ్ లో మాత్రం ముప్ఫయి నుంచి ముప్ఫయి ఐదు డిగ్రీల వరకూ ఉష్ణోగ్రతలు నమోదయ్యే అవకాశాలు ఎక్కువగా ఉన్నాయని వాతావరణ కేంద్రం తెలిపింది. ఈ నెల 24వ తేదీ వరకూ వర్షాలు పడతాయనితెలిపింది.