Rain Alert : తెలంగాణలో రెండు రోజుల వర్షాలు.. ఏపీలో లంక గ్రామాలకు హై అలెర్ట్

తెలంగాణలో రానున్న రెండు రోజుల్లో తేలికపాటి నుంచి మోస్తరు వర్షాలు పడతాయని హైదరాబాద్ వాతావరణ కేంద్రం తెలిపింది. ఈరోజు ఆదిలాబాద్, ఆసిఫాబాద్, మంచిర్యాల, నిర్మల్, నిజామాబాద్, జగిత్యాల, రాజన్న సిరిసిల్ల, కరీంనగర్, పెద్దపల్లి, జయశంకర్ భూపాలపల్లి, ములుగు, కొత్తగూడెం, నల్లగొండ, మహబూబాబాద్, వరంగల్, హన్మకొండ, సంగారెడ్డి, హైదరాాద్, మేడ్చల్ మల్కాజ్ గిరి, వికారాబాద్, సంగారెడ్డి, మెదక్, కామారెడ్డి, మహబూబ్ నగర్, నాగర్ కర్నూలు జిల్లాల్లో వర్షాలు కురిసే అవకాశముందని వాతావరణ కేంద్రం తెలిపింది. దీంతో పాటు వాతావరణ శాఖ ఆ జిల్లాలకు ఎల్లో అలెర్ట్ జారీ చేసింది. ఈరోజుతేలికపాటి జల్లులు కురుస్తాయని చెప్పింది.

ఆంధ్రప్రదేశ్ లోనూ రెండు రోజుల పాటు మోస్తరు నుంచి తేలికపాటి వర్షాలు పడతాయని విశాఖ వాతావరణ కేంద్రం తెలిపింది. అయితే గోదావరి, కృష్ణా నదులకు వరద నీరు పెరగడంతో లోతట్టు ప్రాంతాల ప్రజలు అప్రమత్తంగా ఉండాలని ఆంధ్రప్రదేశ్ విపత్తు నిర్వహణ సంస్థ హెచ్చరించింది. అల్లూరి సీతారామరాజు, తూర్పుగోదావరి, అంబేద్కర్ కోనసీమ, కాకినాడ, ఏలూరు, పశ్చిమ గోదావరి జిల్లాలకు చెందిన అధికారులు అప్రమత్తంగా ఉండాలని, వరద నీరు గ్రామాల్లోకి ప్రవేశించే అవకాశముందని తెలిపింది. అవసరమైతే ప్రజలను సురక్షిత ప్రాంతాలకు తరలించేందుకు సిద్ధంగా ఉండాలని తెలిపింది. అయితే విపత్తు నిర్వహణ సంస్థలో 112, 1070, 1800 425 0101 నెంబర్లకు సూచించారు. గొదావరి నదీపరివాహక ప్రాంతాల్లోని లంక గ్రామ ప్రజలు అప్రమత్తంగా ఉండాలని కోరింది. గోదావరి స్నానాలకు దిగవద్దని కూడా సూచించింది.