Weather Report : వాతావరణ శాఖ కీలక అప్ డేట్.. వర్షాలు.. చలిగాలులు

ఆంధ్రప్రదేశ్ లోనూ చలిగాలుల తీవ్రత ఎక్కువగా ఉంది. అనేక ప్రాంతాల్లో చలి దెబ్బకు ప్రజలు గజగజ వణికిపోతున్నారు. అయితే అమరావతి వాతావరణ శాఖ చెప్పిన దాని ప్రకారం ఈరోజు కొన్ని ప్రాంతాల్లో వర్షం కురిసే అవకాశముందని తెలిపారు. అయితే భారీ వర్షం కురవకపోవచ్చని, మోస్తరు నుంచి తేలికపాటి జల్లులు పడతాయని వాతావరణ శాఖ అంచనా వేసింది. దీంతో చలితీవ్రత మరింత పెరిగే అవకాశముంది. అలాగే పొగమంచు ప్రమాదం కూడా ఎక్కువగా ఉంది. దట్టమైన పొగమంచు అలుము కోవడంతో వాహనదారులు ఇబ్బందులు పడుతున్నారు. అల్లూరి సీతారామరాజు, పార్వతీపురం మన్యం జిల్లాల్లో చలి తీవ్రత ఎక్కువగా ఉందని, సింగిల్ డిజిట్ ఉష్ణోగ్రతలు నమోదవుతున్నాయని వాతావరణ శాఖ వెల్లడించింది.

తెలంగాణలోనూ మరో మూడు రోజుల పాటు చలితీవ్రత ఎక్కువగా ఉంటుందని హైదరాబాద్ వాతావరణ శాఖ అధికారులు అంచనా వేశారు. రానున్న మూడు రోజుల్లో ఉష్ణోగ్రతలు మరింత పడిపోతాయని, సాధారణ ఉష్ణోగ్రతల కంటే మూడు నుంచి నాలుగు డిగ్రీల ఉష్ణోగ్రతలు తగ్గే అవకాశముందని వాతావరణ శాఖ అధికారులు హెచ్చరించారు. పొడి వాతావరణం ఉన్నప్పటికీ చలి తీవ్రత మాత్రం మరింత పెరుగుతుందని తెలిపారు. ఆదిలాబాద్, కొమ్రభీం ఆసిఫాబాద్, మెదక్, సంగారెడ్డి, హైదరాబాద్, వికారాబాద్, రంగారెడ్డి జిల్లాల్లో చలి తీవ్రత ఎక్కువగా ఉంటుందని, ఇక్కడ పది డిగ్రీల కంటే తక్కువ స్థాయిలో ఉష్ణోగ్రతలు నమోదవుతాయని వాతావరణ శాఖ అధికారులు అంచనా వేశారు. ప్రజలు అప్రమత్తంగా ఉండాలని హెచ్చరించింది.