Kadiyam Srihari : కడియం శ్రీహరిని తెలివిగా తప్పించేశారా?

బీఆర్ఎస్ నుంచి గత ఎన్నికల్లో గెలిచిన 10 మంది ఎమ్మెల్యేలపై అనర్హత పిటీషన్లను పరిశీలించి తగిన నిర్ణయం తీసుకోవాలంటూ సుప్రీంకోర్టు ఆదేశాలతో స్పీకర్ గడ్డం ప్రసాదరావు విచారణ ప్రారంభించారు. ఇప్పటికే ఐదుగురు ఎమ్మెల్యేలు పార్టీ మారారనడానికి ఎలాంటి ఆధారాలు లేవని క్లీన్ చిట్ ఇచ్చారు. అయితే తొలి నుంచి ఖైరతాబాద్ ఎమ్మెల్యే దానం నాగేందర్, స్టేషన్ ఘన్ పూర్ ఎమ్మెల్యే కడియం శ్రీహరి పై అనర్హత వేటు పడుతుందని భావించారు. దానం నాగేందర్ నేరుగా 2024 లో జరిగిన ఎన్నికల్లో సికింద్రాబాద్ పార్లమెంటు స్థానానికి కాంగ్రెస్ అభ్యర్థిగా పోటీ చేయగా, కడియం శ్రీహరి కుమార్తె కావ్య వరంగల్ ఎంపీ పదవికి పోటీ చేశారు. ఆ ఎన్నికల్లో కడియం శ్రీహరి తన కుమార్తె గెలుపు కోసం పనిచేశారంటున్నారు.

అంటే ఈ ఇద్దరు కాంగ్రెస్ పార్టీలో చేరినట్లు స్పష్టమైన ఆధారాలున్నాయన్నది బీఆర్ఎస్ నేతల వాదన. కానీ కాంగ్రెస నాయకత్వం మాత్రం కేవలం ఖైరతాబాద్ నియోజకవర్గం నుంచి పోటీ చేసి గెలిచిన దానం నాగేందర్ ఒక్కరి విషయంలోనే నిర్ణయం తీసుకుంది. హైదరాబాద్ నగరంలో జూబ్లీహిల్స్ ఉప ఎన్నికలలో గెలుపుతో సిటీలో మరొక ఉప ఎన్నికలోనైనా సులువుగా గెలవాలని భావించి ఉండవచ్చు. అదే గ్రామీణ ప్రాంతమైన స్టేషన్ ఘన్ పూర్ లో ఉప ఎన్నికలు జరిపి చేయి కాల్చుకునే పరిస్థితుల్లో కాంగ్రెస నాయకత్వం లేదన్నది అర్థమవుతుంది. అందుకే తాను బీఆర్ఎస్ లోనే కొనసాగుతున్నట్లు కడియం శ్రీహరి స్పీకర్ కు ఇటీవల వివరణ ఇచ్చారంటున్నారు. మొత్తం మీద ఉప ఎన్నికల బరి నుంచి కాంగ్రెస్ నాయకత్వం తెలివిగా తప్పించిందన్న విమర్శలను బీఆర్ఎస్ పార్టీ ఘాటుగా చేస్తుంది. మరి స్పీకర్ నిర్ణయం ఎలా ఉంటుందో చూడాల్సి ఉంది.