Summer Effect : భానుడు భగ్గుమంటున్నాడు.. సెగ కక్కుతున్న సూరీడు

ఆంధ్రప్రదేశ్ లోనూ ఉష్ణోగ్రతలు భారీగా నమోదవుతున్నాయి. టెంపరేచర్స్ గరిష్టంగా నమోదవుతున్నాయని అమరావతి వాతావరణ శాఖ అధికారులు తెలిపారు. సూర్యుడు సెగలు కక్కుతున్నాడు. దీంతో ప్రజలు ఉదయం వేళబయటకు రావడానికే భయపడిపోతున్నారు. ప్రధానంగా రాయలసీమలోని కడప, కర్నూలు, అనంతపురం, చిత్తూరు జిల్లాల్లోనూ, ఉత్తరాంధ్రలోనూ ఎండల తీవ్రత ఎక్కువగా ఉంది. ఇక కోస్తాంధ్ర ప్రాంతంలోని ప్రకాశం, పల్నాడు, గుంటూరు, కృష్ణా జిల్లాల్లోనూ అధిక ఉష్ణోగ్రతలు నమోదవుతున్నాయి. ఇప్పటికే కొన్ని చోట్ల నలభై డిగ్రీలు దాటేసినట్లు చెబుతున్నారు.

తెలంగాణలోనూ వేసవి తీవ్రత ఎక్కువగా ఉంది. గతంలో ఏప్రిల్ రెండో వారం నుంచి ఎండల తీవ్రత మొదలయ్యేది. ఈసారి తెలంగాణలోని దాదాపు అన్ని జిల్లాల్లో 35 డిగ్రీల ఉష్ణోగ్రతలు నమోదవుతున్నాయి. భద్రాద్రి కొత్తగూడెం, ఖమ్మం, నల్లగొండ, హైదరాబాద్,వరంగల్, మహబూబాబాద్, కరీంనగర్, మహబూబ్ నగర్ జిల్లాల్లో 35 డిగ్రీల కంటే ఉష్ణోగ్రతలు నమోదువుతున్నాయని హైదరాబాద్ వాతావరణ శాఖ అధికారులు తెలిపారు. రానున్న కాలంలో సాధారణంకంటే రెండు నుంచి మూడు డిగ్రీలు అధికంగా నమోదవుతాయని కూడా వాతావరణ శాఖ అధికారులు హెచ్చరిస్తున్నారు. పగటి వేళ బయటకు రాకపోవడమే మంచిదని వైద్యులు కూడా సూచిస్తున్నారు.