Telangana : తెలంగాణలో చలి తగ్గడం లేదుగా.. వణికిపోతున్న జనం

ప్రధానంగా జాతీయ రహదారిపై దట్టమైన పొగమంచు అలుముకోవడంతో వాహనదారులు ఇబ్బందులు పడుతున్నారు. రైళ్లు, విమానాల రాకపోకలు కూడా ఆలస్యమవుతున్నాయి. నిదానంగా ప్రయాణంచేయాల్సిన పరిస్థితి ఏర్పడుతుంది. ముుందు పది నుంచి పదిహేను గజాల వరకూ అస్సలు కనిపించకపోవడంతో పగటి పూట హెడ్ లైట్స్ వేసుకుని మరీ వాహనాలు వెళ్లాల్సి వస్తుంది. ఇటీవల కొంత చలి తీవ్రత తగ్గింది. అయితే మళ్లీ చలిగాలులు విజృంభిస్తుండటంతో ప్రజలు అనారోగ్యం పాలవుతున్నారు. జలుబు, జ్వరం, ఒళ్లునొప్పులు వంటి వాటితో ఇబ్బంది పడుతూ ఆసుపత్రులకు పరుగులు తీస్తున్నారు. ప్రభుత్వ, ప్రయివేటు ఆసుపత్రులన్నీ రోగులతో కిటకిటలాడుతున్నాయి.

ఇక వృద్ధులు,చిన్న పిల్లలు, దీర్ఘకాలిక రోగులు తగిన జాగ్రత్తలు తీసుకోవాలని వైద్య నిపుణులు సూచిస్తున్నారు. అత్యల్పంగా మెదక్ జిల్లాలో కనిష్ట ఉష్ణోగ్రతలు నమోదయయ్యాయని వాతావరణ శాఖ అధికారులు తెలిపారు. సంగారెడ్డి జిల్లా కొహిర్ లో 6.9 డిగ్రీల ఉష్ణోగ్రత నమోదయింది. కృష్ణాపూర్ లో 9.7 డిగ్రీలు, నర్సాపూర్ లో 9.5 డిగ్రీల ఉష్ణోగ్రతలు నమోదయ్యాయి. హైదరాబాద్ లో 10.5 డిగ్రీల ఉష్ణోగ్రతలు నమోదు కావడంతో ప్రజలు చలికి వణికిపోతున్నారు. ఈ చలిగాలులనుంచి వీలయినంత దూరంగా ఉండాలని వైద్యులు సూచిస్తున్నారు.రానున్న కాలంలో మరింత చలితీవ్రత పెరుగుతుందని వాతావరణ శాఖ అధికారులు చెబుతున్నారు.