Hydra : హైడ్రాను ఐపీఎస్ కు అప్పగించింది అందుకేనట.. రేవంత్ ఆలోచన డిఫరెంట్‌గానే?

అయితే ముఖ్యమంత్రి రేవంత్ రెడ్డి వ్యూహం.. ఆలోచన వేరే విధంగా ఉంది. రెవెన్యూకు సంబంధించిన వ్యవహారాలైనప్పటికీ, స్థలాలకు సంబంధించిన అంశాలైనప్పటికీ, చెరువులు, కుంటలు, నాలాలకు సంబంధించిన విషయాలయినప్పటికీ ఐఏఎస్ అధికారులయితే అంత దూకుడుగా వ్యవహరంచలేరన్న ఆలోచనను ముఖ్యమంత్రి రేవంత్ రెడ్డి చేశారట. వారు ఎక్కువ ఒత్తిళ్లకు లోనుకాలేరు. దీంతో పాటు నిబంధనలు అంటూ నానుస్తూనే ఉంటారు. మరొకవైపు హైడ్రా బాధ్యతలను వాస్తవానికి ఐఏఎస్ అధికారికి అప్పగించాలని తొలుత రేవంత్ రెడ్డి భావించినా తర్వాత ఆ ఆలోచనను విరమించుకున్నారని తెలిసింది.

ఐఏఎస్ కంటే ఐపీఎస్ బెటర్ అన్న ఆలోచన ఆయనకు రావడంతోనే రంగనాధ్ ను నియమించారని చెబుతున్నారు. దీనికి తోడు జీహెచ్ఎంసీ, హెచ్ఎండీఏ అధికారులను సమన్వయం చేసుకుంటూ రెవెన్యూ అధికారులతో మాట్లాడుతూ ఎఫ్‌టీఎల్, బఫర్ జోన్ పరిధిలోకి వచ్చే ప్రాంతాలను గుర్తించి వెంటనే కూల్చివేతలను ప్రారంభించాలంటే ఐపీఎస్ అధికారి అయితే స్పీడ్ గా చేస్తారని ముఖ్యమంత్రి భావించినట్లు చెబుతున్నారు. ఆయన ఆలోచనలకు తగినట్లుగానే ఐపీఎస్ రంగనాధ్ ను నియమించడంతో హైడ్రా అంటేనే నగరంలో ఆక్రమణదారులకు వణుకుపుడుతుంది. ఆయన అన్ని రకాలుగా జాగ్రత్తలు తీసుకుంటూ ఇప్పటి వరకూ అనేక కట్టడాలను కూల్చివేయించారు. అందుకే ఐపీఎస్ ను నియమించినట్లు ఇటీవల తన సన్నిహిత మంత్రుల వద్ద ముఖ్యమంత్రి రేవంత్ రెడ్డి వ్యాఖ్యానించినట్లు తెలిసింది.