Telangana : తెలంగాణలో దంచి కొడుతున్న వర్షం.. క్లౌడ్ బరస్ట్ వార్నింగ్

మెదక్ జిల్లా టెక్మాల్ లో అత్యధికంగా 19.1 శాతం వర్షం నమోదయిందని అధికారులు తెలిపారు. కామారెడ్డి జిల్లా నిజాంసాగర్ లో 18 సెంటీమీటర్లు, సంగారెడ్డి జిల్లా నిజాంపేట్ లో 16.48 సెంటీమీటర్లు, యాదాద్రి జిల్లా భువనగిరిలో 14.93 సెంటీమీటర్లు, మహబూబ్ నగర్ లోని భూత్పూర్ లో 9 సెంటీమీటర్ల వర్షపాతం నమోదయినట్లు వాతావరణ శాఖ అధికారులు ప్రకటించారు. దీంతో పాటు ఉమ్మడి నల్లొండ జిల్లాలోనూ భారీ వర్షం కురుస్తుంది. నల్లగొండ, సూర్యాపేట్, భువనగిరి, యాదగిరిగుట్ట, ఆలేరు, రాజపేట, తుర్కపల్లి, బొమ్మల రామారంలో భారీ వర్షం నమోదయింది. ఇక హైదరాబాద్ నగరంలో కూడా రాత్రి నుంచి వర్షం కురుస్తూనే ఉంది.

హైదరాబాద్ నగరంలో శామీర్ పేట్, మేడ్చల్, హయత్ నగర్, ఎల్బీనగర్, సరూర్ నగర్, దిల్ సుఖ్ నగర్, నాంపల్లి, అమీర్ పేట్, జూబ్లీహిల్స్, రాయదుదర్గం, కొండాపూర్, గచ్చిబౌలి, మియాపూర్, లింగంపల్లి, కూకట్ పల్లి ప్రాంతాల్లోనూ భారీ వర్షం కురిసిందని వాతావరణ శాఖ తెలిపింది. బంగాళాఖాతంలో ఏర్పడిన అల్పపీడన ప్రభావంతో వర్షాలు పడుతున్నాయి. దీనిపై ముఖ్యమంత్రి రేవంత్ రెడ్డి అధికారులతో అత్యున్నత స్థాయి సమావేశాన్ని నిర్వహించారు. అవసరమైన అన్ని ప్రాంతాల్లో జిల్లా, మండల కార్యాలయాల్లో సిబ్బంది సిద్ధంగా ఉండాలని ఆదేశించారు. వంతెనలు, కాజ్ వేలపై ప్రమాదకరమైన స్థాయిలో నీరు ప్రవహిస్తున్నందున దాటే ప్రయత్నం చేయవద్దని, అక్కడ వీలయితే పోలీసు బందోబస్తు ఏర్పాటు చేయాలని సూచించారు.