SLBC Accident : రోజురోజుకూ అడుగంటి పోతున్న ఆశలు.. ఇప్పటికే రెండు రోజులు దాటడంతో?

శ్రీశైలం ఎడమ కాల్వ టన్నెల్ లో మూడడగుల మేర నీరు నిలిచి ఉండటంతో పన్నెండు కిలోమీటర్ల మేరకు బురద పేరుకు పోయింది. ఎన్.డి.ఆర్.ఎఫ్, సింగరేణి రెస్క్యూ టీం ప్రయత్నిస్తున్నా వారి ప్రయత్నాలు ఫలించడం లేదు. రెస్క్యూ ఆపరేషన్ లో ఇండియన్ ఆర్మీ కూడా పాల్గొంటుంది. అయినా లోపల కి వెళ్లేందుకు నీరు అడ్డంకిగా మారుతుంది. చివరకు అన్ని ప్రయత్నాలు చేసి లోపలకు ఆక్సిజన్ ను పంప్ చేస్తున్నారు. బురద, నీరు ఉండటంతో నెమ్మదిగా సహాయక చర్యలు కొనసాగుతున్నాయి. . నీటిని తొలగించేందుకు ఎన్డీఆర్ఎఫ్ సిబ్బంది ఎంత ప్రయత్నిస్తున్నా తిరిగి నీరు చేరుతుంది. బురద నీటిని తొలగించేంత వరకూ చిక్కుకుపోయిన వారిని రక్షించే అవకాశం లేదని ఎన్డీఆర్ఎఫ్ సిబ్బంది చెబుతున్నారు.

పథ్నాలుగు కిలోమీటర్లు లోపలకి వెళ్లి చూసినా కార్మికుల జాడ కనిపించలేదని ఎన్డీఆర్ఎఫ్ సిబ్బంది తెలిపారు. రెండు రోజుల నుంచి మంచినీరు, ఆహారం లేకుండా ఉండటంతో వారు ఎంత మేరకు జీవించి ఉంటారన్న దానిపై అనుమానాలు వ్యక్తమవుతున్నాయి. చిక్కుకుపోయిన కార్మికులను బయటకు తీసుకు వచ్చేందుకు శతవిధాలుగా ప్రయత్నిస్తున్నా సాధ్యం కావడం లేదు. పథ్నాలుగు కిలోమీటర్ వద్ద పై కప్పు కూలడంతో అక్కడకు వెళ్లాలంటే కష్ట సాధ్యమవుతుంది. ఇప్పటి వరకూ కార్మికుల జాడను కనుగొనలేకపోయారు. నిన్ననే నాలుగు గంటల్లో ఆపరేషన్ ముగుస్తుందని భావించినా అది జరగలేదు. దీంతో ఇప్పుడు ఎంత సమయం పడుతుందన్నది చెప్పలేకపోతున్నారు. . ఎనిమిది మంది ప్రాణాలు టన్నెల్ లోనే ఉండటంతో ఉత్కంఠకు ఇంకా తెరపడలేదు.