Kalvakuntla Kavitha : కవిత సస్పెన్షన్.. బహిష్కరణ కాదు.. ఎప్పుడైనా ఎంట్రీ ఇవ్వొచ్చు

కల్వకుంట్ల కవిత మాత్రం తన తండ్రి మంచోడని, వాళ్లిద్దరే విలన్లుగా చిత్రీకరించే ప్రయత్నం చేసి కేసీఆర్ ను కూడా ఈ వివాదంలోకి లాగేశారు. స్థానిక సంస్థల ఎన్నికలు జరుగుతున్న సమయంలో కవిత చేసిన వ్యాఖ్యలు పార్టీని ఖచ్చితంగా ఇబ్బందుల్లోకి పడేస్తాయనే చెప్పాలి. పార్టీ నేతగా మాత్రమే కాదు.. కేసీఆర్ కుమార్తెగా కల్వకుంట్ల కవిత చేసిన వ్యాఖ్యలు జనంలోకి నేరుగా వెళతాయి. అసెంబ్లీ సమావేశాల్లో హరీశ్ రావు కాళేశ్వరం ప్రాజెక్టుపై తమ ప్రభుత్వం తీసుకున్న నిర్ణయాన్ని సమర్ధించుకునేందుకు చేసిన ప్రయత్నాన్ని కవిత దానిపై నీళ్లు కుమ్మరించినట్లయింది. ఇప్పుడు తెలంగాణ సమాజం కూడా కాళేశ్వరంలో అవినీతి జరిగిందని ఖచ్చితంగా నమ్ముతుంది. అది కేసీఆర్ చేశారా? హరీశ్ రావు చేశారా. సంతోష్ రావు చేశారా? అన్నది పక్కన పెట్టి బీఆర్ఎస్ చేసిందన్నది మాత్రం అందరికీ అర్థమయింది. అందువల్లనే కవితను పార్టీ నుంచి సస్పెండ్ చేశారు.

ఇన్నాళ్లూ కాళేశ్వరం ప్రాజెక్టులో జరిగిన అవినీతిపై కాంగ్రెస్ చేసిన ఆరోపణలు రాజకీయపరమైనవిగా జనానికి చెప్పుకునే ఛాన్స్ ఇప్పుడు కారు పార్టీ కోల్పోయిందనే చెప్పాలి. కవిత తన వ్యక్తిగత కక్షలతో పార్టీని రాజకీయ ఇబ్బందుల్లోకి నెట్టిందనే చెప్పాలి. కవిత ఏం ఆశించి... ఎందుకు ఆగ్రహించి ఈ విమర్శలు చేసినా ఏతావాతా నష్టపోయేది పార్టీ మాత్రమే. అది అందరికీ తెలుసు. కవితపై ఒకవేళ పార్టీ చర్య తీసుకున్నప్పటికీ అప్పటికే జరగాల్సి నష్టం పార్టీకి దారుణంగా జరిగిపోయింది. గత కొన్నాళ్లుగా కవిత చేస్తున్న వ్యాఖ్యలు పార్టీని ఇబ్బందిపెడుతున్న కాళేశ్వరం పై చేసిన కామెంట్స్ తో ఇక కోలుకోలేని దెబ్బతీసిందని గులాబీ పార్టీ కార్యకర్తలే వాపోతున్నారు. కవిత వరసగా తన కుటంబ సభ్యులను, కేసీఆర్ చుట్టూ ఉన్న వారిని టార్గెట్ చేయడంతో ఆ అపప్రధ పెద్దాయనకు కూడా చుట్టుకుని పార్టీకి భవిష్యత్ లేకుండా కవిత చేస్తున్నారన్న అభిప్రాయం పార్టీలో బలంగా వినపడుతుంది.

కల్వకుంట్ల కవితపై సస్పెన్షన్ వేటు వేయడం అంటే బహిష్కరణ కాదు. పార్టీ నుంచి పూర్తిగా బయటకు పంపలేదు. తిరిగి కల్వకుంట్ల కవిత నేతలతో సయోధ్య కుదుర్చుకుని పార్టీలోకి వస్తానంటే తీసుకునేందుకు వీలుగా కవితపై సస్పెన్షన్ వేటు వేశారు. గతంలో టీఆర్ఎస్ గా ఉన్నప్పుడు, బీఆర్ఎస్ గా మారిన తర్వాత సస్పెన్షన్ అనే మాట వినిపించలేదు. అందరినీ బహిష్కరించడమే. ఆలె నరేందర్, విజయశాంతి, ఈటల రాజేందర్ వరకూ అందరూ బహిష్కరణకు గురయిన వారే. అయితే పేగు బంధం కవితపై బహిష్కరణ వేటు పడకుండా సస్పెన్షన్ వేటుతోనే సరిపెట్టింది. అంటే కల్వకుంట్ల కవిత మళ్లీ కారు పార్టీలోకి రారన్న గ్యారంటీ అంటూ ఏమీ లేదు. తాత్కాలికంగా పార్టీలో తలెత్తుతున్న సంక్షోభాన్ని రూపుమాపడానికే కల్వకుంట్ల కవితప సస్సెన్షన్ తో సరిపెట్టారన్న కామెంట్స్ అన్ని పార్టీల నుంచి వినిపిస్తున్నయి.