Telangana : నేటి నుంచి బతుకమ్మ పండగ.. తెలంగాణ అంతటా సంబురాలు

ఒక్కోరోజు ఒక బతుకమ్మను వివిధ పూలతో తయారు చేస్తారు. చద్దిని తయారు చేసుకుని వచ్చి నైవేద్యంగా పెడతారు. కొన్ని దశాబ్దాల నుంచి తెలంగాణలో బతుకమ్మ వేడుకలు జరుగుతూ వస్తున్నాయి. ఎన్ని జనరేషన్ లు మారినా ఆ సంప్రదాయాన్ని మాత్రం ఎవరూ వదలిపెట్టకుండా తాము పాల్గొని జరుపుకుంటున్నారు. కేవలం తెలంగాణ మాత్రమే కాదు.. ఇతర దేశాల్లో నివాసం ఉంటున్న తెలంగాణ మహిళలు కూడా బతుకమ్మ వేడుకలను జరుపుకుంటారు.భాద్రపద అమావాస్య లేదా మహాలయ అమావాస్య రోజున ఈ బతుకమ్మ వేడుకలు ప్రారంభమవుతాయి. దుర్గాష్టమి వరకూ కొనసాగుతాయి. రోజుకొక నైవేద్యాన్ని సమర్పిస్తుంటారు. వివిధ రకాల నైవేద్యాలతో బతుకమ్మను ఆరాధించడం ఆనవాయితీగా వస్తుంది. ఈ ఏడాది తిధి పెరగడంతో పది రోజుల పాటు బతుకమ్మ వేడుకలను జరగనున్నాయి. ఏరోజుకారోజు బతుకమ్మను పేర్చి కూర్చి మహిళలు తమ ఆటపాటలతో ఆరాధిస్తారు. ఇందుకు ప్రభుత్వం కూడా అన్ని రకాల ఏర్పాట్లు చేస్తుంది. చెరువుల్లో కలిపేందుకు అవసరమైన ఏర్పాట్లను ప్రభుత్వం చేయనుంది.

ప్రకృతిలో సహజసిద్ధంగా లభించే అందమైన పువ్వులతో కూడిన అమరిక బతుకమ్మ. సాధారణంగా 9 రకాల పూలు.. గునుగు, గుమ్మడి, తంగేడు, కట్ల పూలు, సీతజడ పూలు వంటి వాటిని స్థూపాకారంలో వరుసలుగా అమర్చి పైభాగం మధ్యలో గౌరమ్మను పెడతారు. గుమ్మడి పువ్వు మధ్య భాగాన్ని గౌరమ్మగా భావిస్తారు. పూలతో పాటు పసుపుతో చేసిన గౌరమ్మను ఉంచుతారు. దుర్గరూపంగా భావించే బొడ్డెమ్మగా అమ్మవారిని కొలుస్తారు. ఇక బతుకమ్మ పండుగ వేళ ఊరంతా ఒక్కచోట చేరి బతుకమ్మా (అంటే జీవించు అని అర్థం).. మాకు బతుకునీయవమ్మా (మమ్మల్ని చల్లగా చూడు తల్లీ) అని ఆటపాటలతో అమ్మవారిని వేడుకుంటారు. చూసేందుకు పెద్ద సంఖ్యలో ప్రజలు కూడా చేరతారు. చెరువుల వద్ద బతుకమ్మ నిమజ్జనం చేసే సందర్భంలో ఎలాంటి అవాంఛనీయ ఘటనలు జరగకుండా అన్ని ఏర్పాట్లు చేస్తున్నారు.