Summer Effect : ఉడికి పోతుందిరా అయ్యా... రెండు నెలలు బతికి బట్టకట్టేదెలా?

ఈరోజు శ్రీకాకుళం జిల్లా బూర్జ, హిరమండలం, లక్ష్మీనరసుపేట, పాతపట్నం, విజయనగరం జిల్లా సంతకవిటి, పార్వతీపురంమన్యం జిల్లా గరుగుబిల్లి, పాలకొండ మండలాల్లో తీవ్రవడగాలులు, 28 మండలాల్లో వడగాలులు ప్రభావం చూపే అవకాశం ఉన్నట్లు విపత్తుల నిర్వహణ సంస్థ మేనేజింగ్ డైరెక్టర్ రోణంకి కూర్మనాథ్ తెలిపారు. ఆదివారం 4 మండలాల్లో తీవ్ర, 17మండలాల్లో వడగాలులు వీచే అవకాశం ఉందన్నారు.ఈరోజు శ్రీకాకుళం జిల్లాలో ఒకటి, విజయనగరం జిల్లాలో15, పార్వతీపురంమన్యం జిల్లాలో 9, అల్లూరి సీతారామరాజు జిల్లాలో రెండు , తూర్పుగోదావరి జిల్లా గోకవరం మండలాల్లో వడగాల్పులు వీచే అవకాశం ఉందని, ప్రజలు అలెర్ట్ గా ఉండాలని సూచించారు.

తెలంగాణ కూడా నిప్పుల కొలిమిని తలపిస్తుంది. హైదరాబాద్ నగరం ఉదయం పది గంటల నుంచి నిర్మానుష్యంగా మారుతుంది. ఉదయం పది గంటల నుంచి మొదలయిన భానుడి ప్రతాపం సాయంత్రం ఐదు గంటల వరకూ కొనసాగుతుంది. ఇప్పటికే నిజామాబాద్, ఆదిలాబాద్, నిర్మల్, మంచిర్యాల జిల్లాల్లో నలభై ఐదు డిగ్రీల ఉష్ణోగ్రతలు దాటిపోవడంతో హైదరాబాద్ వాతావరణ శాఖ రెడ్ అలెర్ట్ జారీ చేసింది. మిగిలిన జిల్లాలకు ఆరెంజ్ అలర్ట్ జారీ చేసింది. ఇక్కడ 42 డిగ్రీల ఉష్ణోగ్రతలు నమోదయ్యాయి. ఇక ఈరోజు, రేపు ఎండల తీవ్రత మరింత అధికంగా ఉంటుందని వాతావరణ శాఖ తెలిపింది. సాధారణ ఉష్ణోగ్రతల కంటే గరిష్టంగా రెండు నుంచి మూడు డిగ్రీల ఉష్ణోగ్రతలు అధికంగా నమోదవుతాయని కూడా తెలిపింది.