Weather Report : చినుకు పోయింది... వణుకు మొదలయింది

ఆంధ్రప్రదేశ్ లో కూడా అక్కడక్కడ తేలికపాటి నుంచి మోస్తరు వానలు పడతాయని అమరావతి వాతావరణ శాఖ తెలిపింది. ఉత్తర కోస్తా, దక్షిణ కోస్తా, రాయలసీమ జిల్లాల్లో కొన్ని ప్రాంతాల్లో ఈరోజు తేలికపాటి నుంచి మోస్తరు వానలు పడతాయని తెలిపింది. మరొకవైపు చలితీవ్రత పెరిగే అవకాశముందని కూడా వాతావరణ శాఖ చెబుతుంది. నవంబరు నెలలో సాధారణంగా చలిగాలుల తీవ్రత ఉంటుంది. ఇది ఫిబ్రవరి వరకూ కొనసాగుతాయి. అందుకే ఈ చలిగాలుల్లో సాయంత్రం నుంచి రాత్రివేళ బయటతిరగవద్దని, ముఖ్యంగా దీర్ఘకాలిక రోగులు, ఆస్మా సంబంధిత వ్యాధులతో బాధపడుతున్న వారు తగిన జాగ్రత్తలు తీసుకోవాలని సూచిస్తున్నారు. ఏపీలోని అల్లూరి సీతారామరాజు, పాడేరు వంటి ప్రాంతాల్లో చలి తీవ్రత ఎక్కువగా ఉంటుంది.

తెలంగాణలో ఈరోజు వానలు పడే అవకాశం లేదని హైదరాబాద్ వాతావరణ శాఖ అంచనా వేసింది. పొడి వాతావరణం మాత్రమే ఉంటుందని చెప్పింది. అయితే చలిగాలుల తీవ్రత తెలంగాణలోఅధికంగా ఉండే అవకాశముందని హెచ్చరించింది. కనిష్ట ఉష్ణోగ్రతలు రానున్న రోజుల్లో 9 నుంచి పథ్నాలుగు డిగ్రీలకు పడిపోయే అవకాశముందని కూడా తెలిపింది. ముఖ్యంగా ఏజెన్సీ ప్రాంతమైన ఆదిలాబాద్ జిల్లాలో కనిష్టంగా ఉష్ణోగ్రతలు ఇప్పటికే నమోదవుతున్నాయి. హైదరాబాద్ లోనూ కనిష్ట ఉష్ణోగ్రతలు నమోదవుతున్నాయి. ఉదయం ఎనిమిది గంటల వరకూ పొగమంచు అలుముకుంటుంది. రహదారులపై ప్రయాణాలు చేసే వారు జాగ్రత్తలు పాటించాలి. అలాగే చలినుంచి కాపాడుకోవడానికి ప్రజలు తగిన జాగ్రత్తలు తీసుకోవాలని వైద్యులు సూచిస్తున్నారు.