MS Dhoni : మహేంద్రుడి నిర్ణయానికి వేళయిందా?

అదే సమయంలో ధోని ఐపీఎల్ లోనూ ఇక కనిపించకపోవచ్చు. నాలుగు పదులు దాటిన వయసులో ధోనీ ఆడాలన్నా మనసు అంగీకరించకపోవచ్చు. అందుకే ధోనీకి ఇదే ఐపీఎల్ చివరి సీజన్ అయ్యే అవకాశాలు కనిపిస్తున్నాయి. మొన్ననే ధోనీ రిటైర్ మెంట్ ప్రకటించాల్సి ఉంది. కానీ వచ్చే ఐపీఎల్ లో ఆడేసి ఇక రిటైర్ మెంట్ ప్రకటించే అవకాశముంది. ఇప్పటికే ధోనీ వయసు 44 సంవత్సరాలు కావడంతో ఈ సీజన్ తో ఆడతాడా? అన్న అనుమానాలు కూడా అనేక వార్తల కారణంగా బలపడుతున్నాయి. బహుశ ఈ ఐపీఎల్ సీజన్ లో సీఎస్కే తరుపున ధోనీ పసుపు జెర్సీ ధరిస్తాడా? అన్న సందేహం కూడా వ్యక్తమవుతుంది.

ఎందుకంటే రాజస్థాన్ రాయల్స్ నుంచి సంజూ శాంసన్ ను చెన్నై సూపర్ కింగ్స్ తీసుకుంటుందన్న వార్తలు ఈ అనుమానాన్ని మరింత బలపరుస్తున్నాయి. సంజూ శాంసన్ కూడా బ్యాటర్, వికెట్ కీపర్ కావడంతో ధోనీ స్థానాన్ని పూరించగలరన్న నమ్మకంతో సీఎస్కే యాజమాన్యం సంజూ శాంసన్ ను తమ జట్టులోకి తీసుకునే ప్రయత్నాలు మొదలుపెట్టిందన్న వార్తలు ధోనీ ఇక ఐపీఎల్ లోనూ కనిపించడన్న అనుమానానికి కారణంగా చెప్పాలి. రాజస్థాన్ రాయల్స్ కెప్టెన్ గా ఉన్న సంజూ శాంసన్ ను సీఎస్కే తీసుకుంటే ధోనీ నిష్క్రమణ గ్యారంటీ అన్న వార్తలు వినిపిస్తున్నాయి. నిజానికి ఇది ధోనీ ఫ్యాన్స్ కు హార్ట్ బ్రేకింగ్ న్యూస్ అనే చెప్పాలి. అయితే చర్చల దశలో ఉన్న ఈ ప్రతిపాదన త్వరలో కార్యరూపం దాల్చే అవకాశముందంటున్నారు.