India vs West Indies : గెలిచి తీరాల్సిందే.. దూకుడు, ప్రయోగాలకు ఇది సమయం కాదు మిత్రమా?

అందుకే మార్చి ఒకటో తేదీన కోల్‌కతాలో తలపడే మ్యాచ్ అత్యంత కీలకం. వెస్టిండీస్ పై గెలిచి తీరాల్సిందే. ఓడితే మాత్రం టోర్నీ నుంచి నిష్క్రమించాల్సి వస్తుంది. ఒకరకంగా టీం ఇండియాకు ఈ మ్యాచ్ క్వార్టర్ ఫైనల్ లాంటిదని చెప్పాలి. జింబాబ్వే గెలిచి కొంత ఆశలు సజీవంగా నిలుపుకున్నప్పటీకీ వెస్టిండీస్ పై సమరం ఆషామాషీ కాదు. . బ్యాటింగ్, బౌలింగ్ విభాగాల్లో సమిష్టిగా రాణిస్తే ఈడెన్ గార్డెన్స్‌లో భారత్ గెలుపు ఖాయమవుతుంది. అనవసర ప్రయోగాలకు పోవడం కూడా అంత మంచిది కాదు. ఈ మ్యాచ్ 2016 టీ20 వరల్డ్ కప్ చేదు జ్ఞాపకాలను గుర్తు చేస్తోంది. ఆ నాడు ముంబై వేదికగా జరిగిన సెమీఫైనల్‌లో వెస్టిండీస్ జట్టు భారత్‌ను ఓడించి టోర్నీ నుంచి బయటకు పంపింది.

నాడు విరాట్ కోహ్లీ అద్భుతంగా ఆడినా జట్టుకు విజయాన్ని అందించలేకపోయాడు. ఇప్పుడు మళ్ళీ అదే వెస్టిండీస్‌ను ఓడించి, పాత బాకీ తీర్చుకుంటుందా? లేదా? అన్నది చూడాలి. అయితే వెస్టిండీస్ జట్టు కూడా మంచి ఫామ్ లో ఉంది. ఇటు భారత్, అటు వెస్టిండీస్ జట్లు సౌతాఫ్రికా మీద ఓడిపోయాయి. జింబాబ్వే మీద విజయం సాధించాయి. సమఉజ్జీలు అని చెప్పలేం కానీ, వెస్టిండీస్ లో హెట్ మేయర్ వంటి వారు చెలరేగి ఆడుతున్నారు. అలాగే బౌలింగ్ కూడా పకడ్బందీగానే ఉంది. అందుకే ఈసారి జట్టులో కులదీప్ యాదవ్ ను తీసుకునే అవకాశముందని అంటున్నారు. అయితే బ్యాటర్లలో అభిషేక్ శర్మ, సంజూ శాంసన్, తిలక్ వర్మ, సూర్యకుమార్ యాదవ్, హార్ధిక్ పాండ్యాలు ఫామ్ లోకి రావడం కొంత ఊరట కలిగించే అంశమే అయినా.. భారత అభిమానుల్లో మాత్రం సండే టెన్షన్ మాత్రం బాగా కనిపిస్తుంది.