Cock Fights : గెలిచే కోడి జాతకం చూసెదలా? ఇలా తెలుసుకుంటారట

కోడి కాళ్లకు కత్తిని కట్టి వాటిని కదనరంగంలో దించినప్పుడు వారి ముఖాల్లో ఆనందం చూడాలి. ఎంత చూసినా తనవి తీరదు. ఆ హ్యాపీ నెస్ వేరుగా ఉంటుంది. తాను ఏడాది పెంచిన కోడి యుద్ధంలో గెలిచి విజయం సాధించాలని ప్రతి ఒక్కరూ కోరుకుంటారు. ఇది సంప్రదాయంగా వస్తున్నదే అయినప్పటికీ అనేక సెంటిమెంట్లుకూడా కోడి పందేల విషయంలో పాటిస్తారు. కోళ్ల యజమానుల నుంచి పందెంవేసేవారు సయితం కోడి పురాణం ప్రకారం పందేలు కాస్తారు.కుక్కుటశాస్త్రంలో చెప్పిన విధంగా పందేలను కాస్తూ డబ్బులు సంపాదించుకోవాలన్నప్రయత్నం బరి వద్ద ఉన్న ప్రతిఒక్కరిలోనూ కనపడుతుంది. కోడికి వేల రూపాయల్లో ఖర్చుచేశామన్నవిషయాన్నికూడా ఆ సమయంలో మర్చిపోతారు. కానీ కోడిని పెంచడానికి పడిన శ్రమంతా ఆ ఒక్క రోజుతో మర్చిపోతారు.

కుక్కుట శాస్త్ర ప్రకారం కోడి పందెంలో రెండు అంశాలు ప్రధానమైనవి. కోడి జాతి, రెండు దానికి ఇచ్చే శిక్షణ. కోడి పుంజుల్లో తెల్ల నెమలి, కోడి నెమలి, గౌడ నెమలి, కాకి డేగ, నెమలి కక్కెర, నల్ల కక్కెర, రసంగి, గాజు కుక్కురాయి, అబ్రాస్‌, ఎర్ర డేగ వంటి జాతులు ఉంటాయని పందెం వేసేవాళ్లు చెబుతారు. రెక్కల రంగు, ఇతర శారీరక లక్షణాల ఆధారంగా వీటిని రకాలుగా విభజించారు. ఏడాదికి పైగా శిక్షణ ఇచ్చిన వీరు పందెం బరిలోకి వదులుతారు. కుక్కుట శాస్త్రం ప్రకారమే ఏ జాతి పుంజును బరిలోకి దింపాలా? అన్నది నిర్ణయిస్తారు. కోళ్లకు సంబంధించి ఈ శాస్త్రం లో కోడియజమాని పేరు, జన్మనక్షత్రాలను బట్టి కోడిపుంజును ఎంపిక చేస్తారు. ఆ శాస్త్ర ప్రకారం బరిలోకి దింపితే గెలుపు తథ్యమని భావిస్తారు. ఏ రోజున ఏ పుంజు వేయాలో ఈ శాస్త్రం చెబుతుందని పందెం రాయుళ్లు చెబుతారు.

ఏ రోజు ఏ రంగు కోడిని వేస్తే గెలిచివస్తుందో కూడా ఆ శాస్త్రం చెబుతుందట. మూడు రోజుల పాటు సాగే ఈ పందేలలో మూడు రకాలైన కోళ్లను బరిలోకి దింపడం సంప్రదాయంగా వస్తుంది. భోగి పండగ రోజు గౌడ నెమలి, నెమలికి చెందిన పుంజులు , సంక్రాంతి పండగ రోజున యాసర కాకి డేగలు, కాకి నెమళ్లు, పసిమగల్ల కాకులు, కాకి డేగలకు చెందిన పుంజులు గెలుపొందు తాయన్నది నమ్మకం చాలామందిలో కనిపిస్తుంది. అయితే కుక్కుట శాస్త్రం ఎంత మేరకు ఫలిస్తుందో చెప్పలేం. ఎందుకంటే దానికి శాస్త్రీయత లేదు. అది నమ్మకం మాత్రమే. కానీ పందెం కోళ్లను పెంచేవారు మాత్రం కుక్కుట శాస్త్రాన్ని ఖచ్చితంగా ఫాలో అవుతారు. దానిని ఫాలో కాకుంటే పందెం బరిలోకి కూడా కోడిని దించరంటే అతిశయోక్తి కాదు. అందుకే శాస్త్రం అని వారి నమ్మకమైనా.. కోడి గెలిస్తే.. శాస్త్రం గెలిచినట్లే. ఓడితే మాత్రం దురదృష్టమని అనుకోవడం పరిపాటి.