YSRCP : నాలుగోది కూడా వచ్చేసింది డ్యూడ్.. మరెన్ని లిస్టులుంటాయో?

ఇప్పటికే కొందరికి రాజ్యసభ పదవులు, మరికొందరికి ఎమ్మెల్సీ పదవులు ఆఫర్ ఇచ్చారు. చిత్తూరు ఎమ్మెల్యే ఆరణి శ్రీనివాసులును రాజ్యసభకు, విజయవాడ సెంట్రల్ ఎమ్మెల్యే మల్లాది విష్ణుకు ఎమ్మెల్సీ పదవి హామీ లభించినట్లు పార్టీ వర్గాలు చెబుతున్నాయి. అయితే తమ నియోజకవర్గాలను కోల్పోవడంతో ఒకింత అసంతృప్తికి, అసహనానికి గురైన ఎమ్మెల్యేలు కొందరు సర్దుకుని పోతుండగా, మరికొందరు మాత్రం పార్టీని వీడేందుకు సిద్ధమవుతున్నారు. అనుకున్న స్థాయిలో అసంతృప్తి ఉందని చెప్పలేం. అలాగని లేదని అనలేం. నియోజకవర్గాలను కోల్పోయిన మంత్రులు, ఎమ్మెల్యేలు కొత్త ఇన్‌ఛార్జుల పరిచయ కార్యక్రమంలో కన్నీటి పర్యంతమవుతున్నారు.

తాము నాలుగున్నరేళ్లు ప్రాతినిధ్యం వహించిన నియోజకవర్గాన్ని వదలలేక ఇబ్బంది పడుతున్నారు. ఈ పరిస్థితుల్లో కొత్త వారికి ఎక్కువ అవకాశాలు కల్పిస్తున్నారు. న్యూ ఫేసెస్ అయితే ప్రజలు కూడా కనెక్ట్ అవుతారని, ఎమ్మెల్యేపై ఉన్న వ్యతిరేకత వీరిపై పడదన్న అంచనాతో జాబితాను సిద్ధం చేస్తున్నారు. ఎవరికీ మినహాయింపు ఇవ్వడం లేదు. బంధువులు, సీనియర్లు.. అని చూసీ చూడనట్లు పోవడం లేదు. గెలుపు కష్టమని ఏ మాత్రం ఉప్పందినా నిర్దాక్షిణ్యంగా జగన్ పక్కన పెట్టేస్తున్నారు. ఇది కొంత పార్టీలో కలకలం రేపుతున్నప్పటికీ అంతా మన మంచికేనంటూ జగన్ ముందుకెళుతున్నారు. తాజా జాబితాలో కూడా కొన్ని మార్పులు, చేర్పులు చోటు చేసుకున్నాయి.