ఢిల్లీ మునిగింది.."యమున" ఆగ్రహంతో అధికారుల అప్రమత్తం

ఢిల్లీలో యమునా నది ప్రమాదకర స్థాయిలో పరుగులు తీస్తుంది. యమునా నది ప్రవాహంతో ఢిల్లీలోని అనేక ప్రాంతాలకు వరద నీరు చేరింది. మయూర్ విహార్, యమునా నగర్ ప్రాంతాల్లోకి వరద నీరు ప్రవహించడంతో ప్రజలను అధికారులు సురక్షిత ప్రాంతాలకు తరలించారు. ఢిల్లీలోని లోతట్టు ప్రాంతాల ప్రజలను ప్రభుత్వం అప్రమత్తం చేసింది. యమునా నది ప్రమాదకరమైన స్థాయిలో ప్రవహిస్తున్నందున ఎవరూ నదిలో స్నానాలు చేసే ప్రయత్నం చేయవద్దని కూడా చెబుతున్నారు. అదే సమయంలో ఢిల్లీలోని అనేక ప్రాంతాలకు వరద ముప్పు పొంచి ఉండటంతో అధికారులు అప్రమత్తమయ్యారు.

యమునా నది గరిష్ట నీటి మట్టం 205.33 అడుగులు కాగా, ఇప్పటికే ఢిల్లీలోని పాత రైల్వే వంతెన వద్ద 205.8 అడుగుల వద్దకు చేరి ప్రవహిస్తుందని అధికారులు తెలిపారు. ఢిల్లీలోని కొన్ని ప్రాంతాల్లోని ఇళ్లలోకి నీరు చేరి ప్రజలు ఇబ్బందుుల పడుతున్నారు. పునరావాస కేంద్రాలను ప్రభుత్వం ఏర్పాటు చేయడంతో కొందరు అక్కడికి వెళుతుండగా, మరికొందరు మాత్రం తమ బంధువుల ఇళ్లకు వెళ్లి తలదాచుకుంటున్నారు. పడవల్లో సురక్షిత ప్రాంతాలకు ప్రజలను అధికారులు తరలిస్తున్నారు. ప్రజలు అప్రమత్తంగా ఉండాలని అధికారులు అన్ని చర్యలు చేపట్టారు. ఢిల్లీ ప్రభుత్వం ఇప్పటికే అధికారులకు కీలక ఆదేశాలు జారీ చేసింది. ఎవరూ ప్రాణాలు పోగొట్టుకోకుండా అవసరమైన చర్యలు చేపట్టాలని ఆదేశించింది.