సీబీఐ కొత్త డైరెక్టర్ గా ప్రవీణ్ సూద్

ప్రధాని నరేంద్రమోదీ నాయకత్వంలోని హైపవర్ సెలెక్షన్ కమిటీ ఆయనను సీబీఐ డైరెక్టర్ గా ఎంపిక చేసింది. ఐఐటీ ఢిల్లీ విద్యాసంస్థ నుంచి ఇంజినీరింగ్ పట్టా అందుకున్న ఆయన.. ఆ తర్వాత పోలీస్ విభాగంలో ప్రవేశించి 1989లో మైసూరు ఏఎస్పీగా బాధ్యతలు చేపట్టారు. అనంతరం బళ్లారి, రాయచూరు ఎస్పీగా పనిచేసి, పదోన్నతిపై బెంగళూరు నగర డీసీపీగా వచ్చారు. 1999లో డిప్యుటేషన్ పై మారిషస్ దేశానికి పోలీస్ సలహాదారుగా నియమితులయ్యారు. 2004-2007 మధ్య కాలంలో ప్రవీణ్ సూద్ మైసూరు పోలీస్ కమిషనర్ గా వ్యవహరించారు. ఆయన సేవలకు గుర్తింపుగా పలు విశిష్ట పురస్కారాలు కూడా వరించాయి. 1996లో చీఫ్ మినిస్టర్ గోల్డ్ మెడల్, 2002లో పోలీస్ మెడల్, 2011లో ప్రెసిడెంట్స్ పోలీస్ మెడల్, 2006లో ప్రిన్స్ మైకేల్ ఇంటర్నేషనల్ రోడ్ సేఫ్టీ అవార్డు, 2011లో నేషనల్ ఈ-గవర్నెన్స్ స్వర్ణ పురస్కారం అందుకున్నారు.