Karnataka : తెలంగాణ బాటలోనే కర్ణాటక సిద్ధరామయ్య సర్కార్

కర్ణాటకలో ప్రారంభమయిన కులగణన నేడు ప్రారంభమై అక్టోబర్ 7వ తేదీ వరకూ కొనసాగనుంది. ఈ లెక్కింపులో సుమారు 1.75 లక్షల మంది ఎన్యుమరేటర్లు పాల్గొంటున్నారు. వీరిలో ఎక్కువ మంది ప్రభుత్వ పాఠశాల ఉపాధ్యాయులు ఎన్యుమరేటర్లుగా ఉంటారని అధికారులు తెలిపారు. రాష్ట్రవ్యాప్తంగా ఏడు కోట్ల మందిని, దాదాపు రెండు కోట్ల కుటుంబాలను ఈ కులణనలో ఇంటింటికి తిరిగి సర్వే చేయనున్నారు. కులగణనకు అయ్యే మొత్తం వ్యయాన్ని 420 కోట్ల రూపాయలుగా ప్రభుత్వం అంచనా వేసింది.

కర్ణాటక వెనుకబడిన వర్గాల కమిషన్ ఈ లెక్కింపును సైంటిఫిక్ గా నిర్వహిస్తున్నట్లు తెలిపింది. ఇందుకోసం అరవై ప్రశ్నలను సిద్ధం చేసినట్లు అధికారులు తెలిపారు. అయితే కులగణనలో హిందూ, క్రైస్తవ కులాల పేర్లు రెండింటితోనూ ఉన్న 33 కులాల (ఉదా: కురుబ క్రిస్టియన్, బ్రాహ్మణ క్రిస్టియన్, వొక్కలిగ క్రిస్టియన్) అంశంపై అభ్యంతరాలు వ్యక్తమయ్యాయి. దీనిపై కమిషన్ స్పందిస్తూ, ఈ కులాల పేర్లు జాబితా నుంచి తొలగించలేదని, కానీ యాప్‌లో మాత్రం మాస్క్ చేశామని" అధికారులు తెలిపారు. పౌరుడు తనకు నచ్చినట్లు కులాన్ని నమోదు చేసుకునే అవకాశం ఉంటుంది.