Iran : ఇరాన్ నుంచి భారతీయుల రాక.. అక్కడి పరిస్థితులపై ఏమంటున్నారంటే?

భారత ప్రభుత్వం ఇరాన్ లో నివసిస్తున్న భారతీయులను ఆ దేశం విడిచి రావాలని కోరింది.అక్కడ పరిస్థితులు చాలా కఠినంగా ఉన్నాయని, భారత ప్రభుత్వం పూర్తి సహకారం అందిస్తుందని వీలైనంత త్వరగా ఇరాన్ విడిచిపెట్టాలనే సమాచారాన్ని దౌత్య కార్యాలయం ముందుగానే ఇచ్చిందని ఇక్కడకు వచ్చిన భారతీయులు తెలిపారు. తాము నెల రోజులుగా ఇరాన్‌లో ఉన్నామని, అయితే గత రెండు వారాలుగా సమస్యలు పెరిగాయని తెలిపారు. బయటకు వెళ్తే ఆందోళనకారులు కార్ల ముందు నిలబడి ఇబ్బంది పెట్టేవారు. ఇంటర్నెట్ నిలిపివేయడంతో కుటుంబ సభ్యులకు సమాచారం ఇవ్వలేకపోయామని చెప్పారు. తీవ్ర ఆందోళనలో ఉన్నామని, దౌత్య కార్యాలయాన్ని కూడా సంప్రదించలేకపోయామని కొందరు చెప్పారు.విమానాశ్రయంలో కుటుంబ సభ్యుల ఎదురుచూపులు చూస్తూ వారి కోసం వేచి ఉండటం కనిపించింది.

అక్కడి నిరసనలు చాలా ప్రమాదకరంగా మారాయి. విద్యార్థులను సురక్షితంగా తీసుకురావడంలో భారత ప్రభుత్వం మంచి ప్రయత్నం చేసిందని మరికొందరు అన్నారు.ఇదిలా ఉండగా, ఇందిరాగాంధీ అంతర్జాతీయ విమానాశ్రయంలో తమవాళ్ల కోసం కుటుంబ సభ్యులు పెద్ద సంఖ్యలో ఎదురుచూశారు. ఇరాన్ ఎప్పుడూ భారత్‌కు స్నేహపూర్వక దేశమేనని, అయితే అక్కడ ఆందోళనలు తమను భయపెట్టాయని చెబుతున్నారు. ఇంటర్నెట్ లేకపోవడంతో రోజుల తరబడి సమాచారం రాలేదని, యుద్ధ పరిస్థితుల్లా ఉండటంతో తీవ్ర భయం వేసిందని, ఇప్పుడు సురక్షితంగా స్వదేశానికి చేరుకోవడం ఊరట కలిగిస్తోందని చాలా మంది స్వదేశానికి వచ్చిన వారు చెబుతుండటం విశేషం. టెహ్రాన్‌లోని భారత దౌత్య కార్యాలయం విద్యార్థులు, వ్యాపారులు, యాత్రికులు, పర్యాటకులు సహా భారతీయులు అందుబాటులో ఉన్న వాణిజ్య విమానాల ద్వారా ఇరాన్ విడిచి రావాలని సూచించింది. తదుపరి ఆదేశాలు వచ్చే వరకు ఇరాన్‌కు ప్రయాణాలు మానుకోవాలని కూడా ఎంఈఏ సూచించింది.