మరో ఇరవై ఏళ్లకు భారత్ లో ఎయిర్ ట్యాక్సీ సేవలు

అడ్వాన్స్‌డ్‌ ఎయిర్‌ మొబిలిటీ వెర్టిప్యాడ్‌ మార్కెట్‌ అధ్యయనం ప్రకారం, ఢిల్లీని ప్రారంభానికి అత్యంత అనుకూల నగరంగా గుర్తించారు. ఎక్కువ ప్రయాణ దూరాలు, పీక్‌ అవర్స్‌లో నెమ్మదిగా కదిలే ట్రాఫిక్‌, రవాణా కోసం రోడ్లపై అధిక ఆధారపడటం వంటి అంశాలను నివేదిక ప్రస్తావించింది.ఈ నివేదిక ప్రకారం 2045 నాటికి ఢిల్లీలో ఏటా సుమారు 400 మిలియన్‌ డాలర్ల ప్రయాణికుల ఆదాయం వచ్చే అవకాశం ఉంది. ఇదే విధంగా దేశవ్యాప్తంగా ఇది సుమారు 2.5 బిలియన్‌ డాలర్లకు చేరవచ్చని అంచనా వేసింది. అదే సమయంలో దేశమంతటా 10 వేల నుంచి 15 వేల వెర్టిప్యాడ్లు అవసరమవుతాయని, ఇందులో ఢిల్లీలోనే దాదాపు 2,200 వెర్టిప్యాడ్లు ఉండాల్సి ఉంటుందని స్కైపోర్ట్జ్‌ మోడలింగ్‌ పేర్కొంది.

భవనాల సంపద పెరగడం, నిర్వహణ ఖర్చులు తక్కువగా ఉండడం వల్ల కాలక్రమంలో ఎయిర్‌ టాక్సీ సేవలు మరింత మందికి అందుబాటులోకి వచ్చే అవకాశం ఉందని అధ్యయనం తెలిపింది. ఎయిర్‌ టాక్సీ ఖర్చులు తగ్గితే నగరాల్లోపల, సమీప నగరాల మధ్య ప్రయాణాలు మరింత పోటీగా మారతాయని నివేదిక తెలిపింది. దీంతో కొద్ది ప్రాంతాలకు పరిమితం కాకుండా మెట్రోపాలిటన్‌ ప్రాంతమంతా వెర్టిప్యాడ్లు విస్తరించే అవసరం ఏర్పడుతుందని అంచనా వేసింది. ఢిల్లీ వ్యవస్థలో ఏర్పడే వెర్టిప్యాడ్లలో సుమారు 80 శాతం నగర ప్రయాణికుల సేవలకు ఉపయోగపడతాయని, మిగిలినవి అంతర్‌నగర, ప్రాంతీయ ప్రయాణాలకు కేటాయిస్తారని పేర్కొంది. స్కైపోర్ట్జ్‌ రూపొందించిన ‘ఏరోబెర్మ్‌’ మాడ్యులర్‌ వెర్టిప్యాడ్‌ వ్యవస్థ అధిక జనసాంద్రత ఉన్న ఢిల్లీ వంటి నగరాల్లో వేగంగా ఏర్పాటు చేసేలా రూపొందించామని కంపెనీ తెలిపింది. నేలపై, భవనాల పైకప్పులపై అమర్చుకునే వీలుండి, కొద్ది డజన్ల నుంచి వేల వెర్టిప్యాడ్ల వరకు దశలవారీగా విస్తరించే అవకాశం ఉందని వివరించింది.