లాలూ ప్రసాద్ యాదవ్ అప్పట్లో ఉద్యోగాలు ఇప్పిస్తానని చెప్పి అలా చేశారని ఆరోపణలు

దాణా కుంభకోణంలో బిహార్ మాజీ ముఖ్యమంత్రి లాలూ ప్రసాద్ యాదవ్‌కు ఇటీవలే బెయిల్ లభించగా.. తాజాగా సీబీఐ మరో కేసు నమోదుచేసింది. 2004 నుంచి 2009 వరకు కేంద్ర రైల్వే మంత్రిగా ఉన్నప్పుడు ఉద్యోగాల భర్తీలో అవకతకలకు పాల్పడ్డారని ఆరోపణలు వచ్చిన నేపథ్యంలో లాలూ ఆయన కుటుంబసభ్యులపై సీబీఐ కేసు నమోదు చేసింది. లాలూ కుటుంబసభ్యుల నివాసాలు సహా 15 ప్రాంతాల్లో సీబీఐ అధికారులు శుక్రవారం ఉదయం సోదాలు చేపట్టారు. లాలూ, అతని కుమార్తెలు అవినీతికి పాల్పడినట్టు ప్రాథమిక విచారణలో వెల్లడి కావడంతో సీబీఐ కొత్తగా మరో కేసు నమోదు చేసింది. ఉద్యోగార్థులు కావాలని వచ్చిన వారి నుంచి స్థలాలు, భూములను తీసుకున్నట్టు ఆరోపణలు ఉన్నాయి. ఈ వ్యవహారంలోనే లాలూపై సీబీఐ కేసు నమోదు చేసింది.