అ కాఫీ షాప్ రెజీనా రాత మారుస్తుందా?
మీడియం బడ్జెట్ సినిమాల హీరోయిన్ గా మోస్తరు విజయాల్ని అందుకోవటంతో పాటు మెగా మేనల్లుడు సుప్రీమ్ హీరో సాయి ధరమ్ తేజ్ సరసన పిల్ల నువ్వు లేని జీవితం, సుబ్రహ్మణ్యం ఫర్ సేల్ వంటి రెండు విజయవంతమైన చిత్రాలలో నటించి మంచి ఫేమ్ సంపాదించిన రెజీనా కాసాండ్రా ఊహలు గుసగుసలాడే చిత్రంతో డైరెక్టర్ గా మారిన యాక్టర్ శ్రీనివాస్ అవసరాల చేసిన ఫీల్ గుడ్ ఫామిలీ డ్రామా జ్యో అచ్యుతానంద తో కూడా బాగా ఆకట్టుకోగలిగింది. కానీ అమ్మడికి 2017 తెలుగు ప్రేక్షకులని మెప్పించే చిత్రం ఒక్కటి కూడా ఇవ్వలేకపోయింది. తమిళ చిత్రం మానగరం తెలుగు అనువాద రూపంగా వచ్చిన నగరం, కృష్ణ వంశి తెరకెక్కించిన నక్షత్రం, నారా రోహిత్ సరసన కథానాయికగా చేసిన బాలకృష్ణుడు వరుసగా బాక్స్ ఆఫీస్ డిజాస్టర్స్ కావటంతో 2017 రెజీనా మర్చిపోలేని చేదు జ్ఞాపకంగా మిగిలిపోయింది.
ఈ ఏడాది లోనైనా తన చిత్రాలతో ప్రేక్షకులని మెప్పిస్తూ బాక్స్ ఆఫీస్ హిట్స్ అందుకోవాలని తపన పడుతున్న రెజీనా రాబోతున్న 'అ' చిత్రం పైనే హోప్స్ పెంచుకుని నిరీక్షిస్తుంది. కాఫీ షాప్ లో పనిచేసే యువతీ గా కనిపించబోయే ఈ చిత్రంలో మాదక ద్రవ్యాల వ్యసనం బారిన పడి మారిపోయే తన పాత్రలో వివిధ వేరియేషన్స్ ప్రదర్శించి చాలా కాన్ఫిడెంట్ గా ఉందట రెజీనా. మరి 'అ' చిత్రం రెజీనా భవిష్యత్ ని ఎలాంటి మలుపు తిప్పుతుందో త్వరలోనే తేలనుంది.
