బాహుబలి 2.. హిందీ శాటిలైట్ రైట్స్ 51 కోట్లు!

భారత చిత్ర పరిశ్రమ లోనే అత్యంత గొప్ప చిత్రంగా బాహుబలి ది బిగినింగ్ చిత్రాన్ని ఎందరో విశ్లేషకులు, సినీ పండితులు కొనియాడారు. అమితాబ్ బచ్చన్ సైతం బాహుబలి లో ఏ చిన్న పాత్రైనా పోషిస్తానని వెల్లడించి ఆయనకు ఆ చిత్రం పై వున్న మమకారాన్ని చాటి చెప్పారు. ఈ ప్రశంసలు పక్కన పెడితే ప్రేక్షకులు కూడా ఈ చిత్రాన్ని భారీ స్థాయి లోనే ఆదరించి వారి అభిమానాన్ని వసూళ్ల రూపంలో ప్రదర్శించారు. భారత దేశ చలన చిత్ర చరిత్రలోనే పీకే తరువాత స్థానంలో నిలిచి సెకండ్ హైయెస్ట్ గ్రోసర్ అయ్యింది బాహుబలి ది బిగినింగ్.

బాహుబలి 2 ఎట్టి పరిస్థితుల్లో తొలి స్థానం కైవసం చేసుకుంటుంది అని ట్రేడ్ వర్గాల అంచనా. బాహుబలి 2 కోసం ప్రపంచ వ్యాప్తంగా చిత్ర ప్రేక్షకులు ఎదురు చూస్తున్నారు. ఇటీవల బాహుబలి 2 చిత్రానికి సంబంధించిన వ్యాపార వ్యవహారాలు ముగిసినట్టు సమాచారం. హిందీ శాటిలైట్ హక్కులను సోనీ టీవీ సంస్థ ఏకంగా 51 కోట్లు వెచ్చించి సొంతం చేసుకుంది అని వినికిడి. ఈ సంఖ్య కనుక నిజం అయితే బాలీవుడ్ సూపర్ స్టార్ సల్మాన్ ఖాన్ సుల్తాన్ చిత్రం సాధించిన శాటిలైట్ రైట్స్ కన్నా అధిక మొత్తానికి అమ్ముడుపోయిన రికార్డు దక్కుతుంది. సుల్తాన్ చిత్రాన్ని రెండవ స్థానానికి నెత్తిన ఘనత బాహుబలికి దక్కుతుంది.

బాహుబలి 2 చిత్రీకరణ శరవేగంగా పూర్తి చేసే పనిలో రాజమౌళి తన బృందాన్ని నిమగ్నం చేసి ఉంచారు. 2017 మే నెలలో బాహుబలి 2 విడుదల అయ్యే అవకాశాలు కనిపిస్తున్నాయి. విడుదలకు ఆరు నెలల ముందే డిస్ట్రిబ్యూషన్ తో పాటు, శాటిలైట్ హక్కులు కూడా అమ్ముడైపోవడం కూడా గొప్ప పరిణామంగానే చెప్పుకోవాలి.