600 ఏళ్ల తర్వాత అగ్నిపర్వతం బద్దలు.. ఆ కారణంగా పెను ప్రమాదం తప్పింది

రష్యాలోని కమ్చట్కా ద్వీపకల్పంలో ఆరు శతాబ్దాల తర్వాత క్రాషెనిన్నికోవ్ అగ్నిపర్వతం బద్దలైంది. ఈ భారీ విస్ఫోటనంతో సుమారు 6 కిలోమీటర్ల ఎత్తు వరకు బూడిద, ధూళి ఆకాశంలోకి ఎగసిపడ్డాయి. కొన్ని రోజుల క్రితం ఇదే ప్రాంతంలో 8.8 తీవ్రతతో భారీ భూకంపం సంభవించగా, ఆ ప్రభావం వల్లే ఈ అగ్నిపర్వతం విస్ఫోటనం జరిగిందని నిపుణులు అనుమానిస్తున్నారు. రష్యా అధికారులు విడుదల చేసిన సమాచారం ప్రకారం, అగ్నిపర్వతం నుంచి వెలువడిన బూడిద తూర్పు దిశగా పసిఫిక్ మహాసముద్రం వైపు కదులుతోంది. అది ప్రయాణిస్తున్న మార్గంలో ఎలాంటి జనావాసాలు లేకపోవడంతో పెను ప్రమాదం తప్పింది. అగ్నిపర్వతం నుంచి ఇంకా స్వల్ప స్థాయిలో విస్ఫోటనాలు కొనసాగే అవకాశం ఉందని ఎరప్షన్ రెస్పాన్స్ టీమ్ చెబుతోంది. ఈ విస్ఫోటనం జరిగిన సమయంలోనే 7.0 తీవ్రతతో మరో భూకంపం కూడా సంభవించింది. చారిత్రక ఆధారాల ప్రకారం 600 ఏళ్లలో క్రాషెనిన్నికోవ్ అగ్నిపర్వతం బద్దలవడం ఇదే మొదటిసారని నిపుణులు తెలిపారు.