తూర్పు పసిఫిక్‌లో పడవపై అమెరికా దాడి… ఆరుగురు మృతి

అమెరికా అధ్యక్షుడు డొనాల్డ్ ట్రంప్ మాట్లాడుతూ లాటిన్ అమెరికాలోని కార్టెల్ గుంపులతో అమెరికా “సాయుధ ఘర్షణ”లో ఉందని చెప్పారు. అమెరికాకు మాదకద్రవ్యాల ప్రవాహాన్ని అడ్డుకోవడానికి ఈ దాడులు అవసరమైన చర్యలని సమర్థించారు. అయితే “నార్కో టెర్రరిస్టులను” హతమార్చామని చెప్పేందుకు ప్రభుత్వం పెద్దగా ఆధారాలు చూపలేదని విమర్శలు వినిపిస్తున్నాయి. శనివారం లాటిన్ అమెరికా దేశాల నాయకులతో జరిగిన సమావేశంలో ట్రంప్ మరోసారి ఈ అంశాన్ని ప్రస్తావించారు. మాదకద్రవ్యాల అక్రమ రవాణా గుంపులు, అంతర్జాతీయ నేర గ్యాంగులు ప్రాంత భద్రతకు అంగీకరించలేని ముప్పుగా మారాయని చెప్పారు. వాటిపై సైనిక చర్యలకు అమెరికాతో కలిసి రావాలని ఆయా దేశాలను కోరారు.

ఈ నేపథ్యంలో ఈక్వడార్ మరియు అమెరికా ఈ వారం దక్షిణ అమెరికా దేశంలో నిర్వహించిన చర్యల్లో ఆర్గనైజ్డ్ క్రిమినల్స్ ను లక్ష్యంగా చేసుకున్నాయి. అదే సమయంలో మధ్యప్రాచ్యంలో ఇరాన్‌తో యుద్ధం కొనసాగుతున్నప్పటికీ పశ్చిమ అర్ధగోళంపై అమెరికా విదేశాంగ విధానం దృష్టి కొనసాగుతుందని చూపించాలనే ఉద్దేశంతో ఈ సమావేశాన్ని ట్రంప్ నిర్వహించినట్లు విశ్లేషకులు భావిస్తున్నారు.ఇక పడవలపై దాడుల చట్టబద్ధతపై విమర్శకులు సందేహాలు వ్యక్తం చేస్తున్నారు. ముఖ్యంగా అమెరికాలో అధిక మరణాలకు కారణమైన ఫెంటానిల్ అనే మాదకద్రవ్యం సాధారణంగా మెక్సికో నుంచి భూమార్గం ద్వారా అమెరికాకు చేరుతుందని వారు చెబుతున్నారు. ఆ డ్రగ్ తయారీలో ఉపయోగించే రసాయనాలు చైనా, భారత్ నుంచి మెక్సికోకు చేరుతున్నాయని పేర్కొంటున్నారు. మొదటి పడవపై జరిగిన దాడి తర్వాత బతికిపోయిన వారిపై మరోసారి దాడి చేసి సైన్యం చంపినట్లు వెలుగులోకి రావడంతో తీవ్ర విమర్శలు వచ్చాయి. ట్రంప్ ప్రభుత్వం, రిపబ్లికన్ నేతలు అది చట్టబద్ధమని సమర్థించగా, డెమోక్రాటిక్ పార్టీ నాయకులు, న్యాయ నిపుణులు ఆ చర్యలను హత్యలుగా, అంతేకాక యుద్ధ నేరాలుగా కూడా అభివర్ణించారు.