America : అమెరికా షట్ డౌన్ తో ఎన్ని కష్టాలు.. భారమంతా వాటిపైనే?

ఎయిర్ పోర్టుల్లోనే గంటల తరబడి వేచి చూడాల్సి ఉంటుంది. అయినా ప్రయాణం జరుగుతుందో లేదో తెలియని పరిస్థితి నెలకొంది. అమెరికాలో గత 38 రోజులకు పైగానే షట్ డౌన్ కొనసాగుతుంది. ఇది ఒక రకంగా రికార్డు. గతంలో ఎప్పుడూ ఇన్ని రోజులు షట్ డౌన్ కొనసాగేలేదన్న విషయాన్ని విశ్లేషకులు గుర్తు చేస్తున్నారు. షట్ డౌన్ తో టూరిజం, షిప్పింగ్‌, తయారీ రంగాలపై కూడా ప్రభావం పడే అవకాశం ఉంది. థ్యాంక్స్‌గివింగ్‌ వారానికి చేరుకునే సమయానికి పరిస్థితి మరింత తీవ్రమవుతుందనే ఆందోళన వ్యక్తమవుతోంది. ఫ్లైట్‌అవేర్‌ వెబ్‌సైట్‌ ప్రకారం శనివారం మధ్యాహ్నం నాటికి నార్త్‌ కరోలినాలోని చార్లెట్‌ విమానాశ్రయంలో 130 విమానాలు రద్దు అయ్యాయి. అట్లాంటా, చికాగో, డెన్వర్‌, న్యూఆర్క్‌ విమానాశ్రయాల్లో కూడా అనేక విమానాలు రద్దయ్యాయి.

ఫెడరల్‌ ఏవియేషన్‌ అడ్మినిస్ట్రేషన్‌ అందించిన సమాచారం ప్రకారం నలభై విమానాశ్రయాల్లో వాణిజ్య విమానాల సంఖ్యను నాలుగు శాతం తగ్గించగా, మంగళవారం అది పెరగనుంది. శుక్రవారం నాటికి 10 శాతం సర్వీసులను నిలిపివేయనున్నట్లు తెలిపింది. సిబ్బంది కొరతతో కంట్రోల్‌ టవర్లలో ఒత్తిడి పెరిగింది. దాదాపు నెల రోజులుగా వేతనం అందకపోవడంతో అనేక మంది ఎయిర్‌ ట్రాఫిక్‌ కంట్రోలర్లు కూడా సిక్ లీవ్ లు తీసుకుంటున్నారు. కొన్ని విమానాలు రద్దు కావడంతో ప్రయాణికులు తక్షణమే రీబుకింగ్‌ చేసుకున్నారు. అమెరికా విమాన రవాణాలో సగం సరుకు రవాణా వాణిజ్య విమానాల ద్వారానే జరుగుతుంది. ఇప్పడు దానిపైన కూడా ప్రభావం పడుతుంది. దీంతో ఆర్థిక వ్యవస్థపై పడుతుందన్న ఆందోళన వ్యక్తమవుతుంది.