Israel - Iran War : యుద్ధం నెలరోజులు దాటినా ముగిసేట్లు లేదుగా

జలసంధి మూసివేతతో అమెరికాలో సగటు పెట్రోల్ ధర గ్యాలన్‌కు 4 డాలర్లను దాటింది. ఇస్ఫహాన్ నగరంపై అమెరికా దాడులతో భారీ అగ్నిగోళం ఆకాశంలోకి ఎగిసింది. టెహ్రాన్ పెర్షియన్ గల్ఫ్‌లో పూర్తిగా చమురు నింపిన కువైట్ ట్యాంకర్‌పై దాడి చేసింది. ఫిబ్రవరి 28న అమెరికా, ఇజ్రాయెల్ దాడులతో ప్రారంభమైన యుద్ధం నెల దాటినా తీవ్రత తగ్గలేదు. ప్రపంచ చమురు, సహజ వాయువు సరఫరాల్లో అంతరాయం ఏర్పడింది. ప్రపంచ మార్కెట్లు ఒత్తిడికి లోనయ్యాయి. అనేక అవసర సరుకుల ధరలు పెరిగాయి. ఇప్పటివరకు 3 వేల మందికి పైగా మృతి చెందినట్లు అంచనా. బ్రెంట్ క్రూడ్ ధర మంగళవారం బ్యారెల్‌కు 107 డాలర్ల వద్ద కొనసాగింది. యుద్ధం ప్రారంభం నుంచి ఇది 45 శాతం పైగా పెరిగింది. స్పష్టమైన ముగింపు లేకుండా మొదలైన ఈ యుద్ధంలో చేరేందుకు యునైటెడ్ కింగ్‌డమ్, ఫ్రాన్స్ వంటి దేశాలు నిరాకరించాయని ట్రంప్ ఆరోపించారు. ఫ్రాన్స్ తన గగనతలంలో అమెరికా సైనిక సరఫరా విమానాలకు అనుమతి ఇవ్వలేదని విమర్శించారు. అయితే ఇస్ట్రెస్ వైమానిక స్థావరాన్ని ఉపయోగించేందుకు మాత్రమే అనుమతిచ్చిందని, అక్కడి నుంచి దాడులకు సహకరించలేదని ఫ్రాన్స్ తెలిపింది. స్పెయిన్ అమెరికా యుద్ధానికి సంబంధించిన విమానాలకు తన గగనతలాన్ని మూసివేసింది. ఇటలీ సిసిలీలోని సిగోనెల్లా వైమానిక స్థావరాన్ని వాడేందుకు నిరాకరించినట్లు సమాచారం. అయితే రెండు దేశాల మధ్య సంబంధాలు చల్లబడలేదని ఇటలీ రక్షణ మంత్రి గ్విడో క్రోసెట్టో తెలిపారు.

బాగ్దాద్‌లో అమెరికన్ ఫ్రీలాన్స్ జర్నలిస్టు షెల్లీ కిట్టిల్సన్‌ను మంగళవారం అపహరించారు. ఆమెను ఇరాన్ మద్దతు ఉన్న కతాఇబ్ హిజ్బుల్లా మిలీషియా అపహరించిందని అమెరికా అధికారి ఆరోపించారు. రెండు కార్లతో ఈ అపహరణ జరిగినట్లు ఇరాక్ భద్రతాధికారులు తెలిపారు. ఒక కారు ప్రమాదానికి గురికాగా అందులోని వ్యక్తిని అదుపులోకి తీసుకున్నారు. జర్నలిస్టును మరో కారులో తరలించారు. ఈ వ్యక్తికి ఉన్న ముప్పులపై ముందుగానే హెచ్చరించినట్లు అమెరికా విదేశాంగ శాఖ తెలిపింది. ఆమె ముఖ్యమైన రిపోర్టింగ్ చేస్తున్నారని పనిచేసిన మీడియా సంస్థ పేర్కొంది.నార్ఫోక్ నుంచి యుఎస్‌ఎస్ జార్జ్ హెచ్ డబ్ల్యూ బుష్ విమాన వాహక నౌక మంగళవారం బయలుదేరింది. ఇది మిడిల్ ఈస్ట్‌కు వెళ్లనుంది. ఇప్పటికే యుఎస్‌ఎస్ జెరాల్డ్ ఆర్ ఫోర్డ్ మరమ్మతుల్లో ఉంది. యుఎస్‌ఎస్ అబ్రహాం లింకన్ జనవరిలో అక్కడికి చేరింది. ఇరాన్ యుద్ధానికి మూడో విమాన వాహక నౌకగా ఇది నిలవనుంది.

త్వరలో కాల్పుల విరమణ కుదరకపోతే, జలసంధి తిరిగి తెరవకపోతే ఖార్గ్ దీవిలోని చమురు ఎగుమతి కేంద్రం, ఉప్పునీటి శుద్ధి కేంద్రాలపై దాడులు విస్తరిస్తామని ట్రంప్ హెచ్చరించారు.పెంటగాన్‌లో రక్షణ మంత్రి పీట్ హెగ్సెత్ భూసేన దళాలు యుద్ధంలోకి దిగుతాయా అన్న ప్రశ్నకు స్పష్టత ఇవ్వలేదు. అవసరమైన దానికంటే ఎక్కువ సైనిక చర్యలు చేయాలనుకోవడం లేదని చెప్పారు. ఈ యుద్ధం ప్రారంభమైనప్పటి నుంచి 13 మంది అమెరికా సైనికులు మరణించారు. 348 మంది గాయపడ్డారు. వారిలో ఆరుగురి పరిస్థితి విషమంగా ఉందని సెంట్రల్ కమాండ్ ప్రతినిధి తెలిపారు.బెయ్రూట్ ప్రాంతంలో రెండు వేర్వేరు దాడుల్లో హిజ్బుల్లా సీనియర్ కమాండర్ సహా ఇద్దరు నేతలను హతమార్చినట్లు ఇజ్రాయెల్ సైన్యం తెలిపింది. లితానీ నది దక్షిణ ప్రాంతాన్ని నియంత్రించాలనే యోచనలో ఉన్నట్లు ఇజ్రాయెల్ రక్షణ మంత్రి తెలిపారు.యుద్ధం నేపథ్యంలో యునైటెడ్ అరబ్ ఎమిరేట్స్ ఇరానీయుల ప్రవేశాన్ని నిలిపివేసింది. ఎమిరేట్స్, ఎతిహాద్, ఫ్లై దుబాయ్ విమానయాన సంస్థలు తమ వెబ్‌సైట్లలో ఈ ప్రకటనలు చేశాయి.ఇరాన్‌లో 1,900 మందికి పైగా మృతి చెందినట్లు అధికారులు తెలిపారు. ఇజ్రాయెల్‌లో 19 మంది మరణించారు. గల్ఫ్ దేశాలు, వెస్ట్ బ్యాంక్‌లో 24 మంది మృతి చెందారు. లెబనాన్‌లో 1,200 మందికి పైగా మరణించారు. 10 లక్షల మందికి పైగా ప్రజలు నివాసాలు విడిచారు. లెబనాన్‌లో 10 మంది ఇజ్రాయెల్ సైనికులు కూడా మృతి చెందినట్లు సమాచారం.