Donald Trump : భారత్ పై చల్లారని ట్రంప్ ఆగ్రహం.. 500 శాతం టారిఫ్ పెంచేందుకు

ఉక్రెయిన్ శాంతి కోసం కొన్ని రాయితీలు ఇస్తోందని, కానీ పుతిన్ మాటలకే పరిమితమై నిరపరాధులను చంపుతూనే ఉన్నారని, రష్యా చమురు కొనుగోలు చేసే దేశాలను శిక్షించేందుకు ఈ బిల్లు అధ్యక్షుడికి పూర్తి అధికారాలు ఇస్తుందని గ్రాహమ్ సోషల్ మీడియా వేదికగా తెలిపారు. ఈ బిల్లు అమలైతే చైనా, భారత్‌, బ్రెజిల్‌ వంటి దేశాలపై భారీ ఒత్తిడి పెరుగుతుందని గ్రాహమ్ స్పష్టం చేశారు. రష్యా తక్కువ ధర చమురు కొనుగోళ్లతో పుతిన్ యుద్ధ యంత్రానికి నిధులు అందుతున్నాయన్నది ఆయన వాదన. వచ్చే వారం నుంచే ఈ బిల్లుపై సెనెట్‌లో బలమైన ద్విపక్ష మద్దతుతో ఓటింగ్ జరిగే అవకాశం ఉందని చెప్పారు.రష్యా నుంచి ఇంధనం కొనుగోలు చేస్తోందన్న కారణంతో భారత్‌పై అమెరికా ఇప్పటికే 25 శాతం టారిఫ్ విధించింది. మొత్తం మీద భారత్‌పై విధించిన టారిఫ్‌లు 50 శాతం వరకు చేరాయని గ్రాహమ్ తెలిపారు.

గ్రాహమ్, బ్లూమెన్‌థాల్ కలిసి ప్రవేశపెట్టిన ‘శాంక్షనింగ్ రష్యా యాక్ట్–2025’ బిల్లులో, రష్యా చమురు ద్వితీయ కొనుగోలు, పునర్విక్రయాలపై 500 శాతం టారిఫ్ ప్రతిపాదన ఉంది. ఈ బిల్లుకు సెనేట్ విదేశాంగ కమిటీ సభ్యులలో ఎక్కువ మంది సహప్రయోజకులుగా ఉన్నారు. ఇటీవల భారత రాయబారి వినయ్ క్వాత్రా, రష్యా చమురు కొనుగోళ్లు తగ్గిస్తున్నామని గ్రాహమ్‌కు తెలియజేశారు. భారత్‌పై విధించిన టారిఫ్‌లు తగ్గించాలని ట్రంప్‌కు చెప్పాలని కోరినట్టు గ్రాహమ్ వెల్లడించారు. భారత్ తన ముడి చమురు అవసరాల్లో దాదాపు 88 శాతం విదేశాల నుంచే దిగుమతి చేసుకుంటోంది. 2021 వరకు భారత్ దిగుమతుల్లో రష్యా చమురు వాటా కేవలం 0.2 శాతం మాత్రమే. 2022 ఫిబ్రవరిలో ఉక్రెయిన్‌పై రష్యా దాడి తర్వాత పశ్చిమ దేశాలు రష్యాను దూరం పెట్టడంతో, తక్కువ ధరల రష్యా చమురును భారత్ పెద్ద ఎత్తున కొనుగోలు చేసింది. ఈ ప్రభావంతో స్టాక్ మార్కెట్ లు కుప్పకూలాయి.