Pak vs Afghanisthan : మూడు వారాల నుంచి వార్...ఆఫ్ఘనిస్తాన్‌లో పాకిస్థాన్ వైమానిక దాడులు

పాకిస్థాన్ సమాచార మంత్రిత్వ శాఖ మాత్రం తమ సైన్యం ఆఫ్ఘనిస్తాన్‌లోని నాలుగు ఉగ్రవాద స్థావరాలపై విజయవంతంగా వైమానిక దాడులు నిర్వహించిందని ప్రకటించింది. ఆ స్థావరాలకు సహకరించే మౌలిక సదుపాయాలనూ లక్ష్యంగా చేసుకున్నామని పేర్కొంది. పౌరుల నివాసాలపై ఎలాంటి దాడులు చేయలేదని స్పష్టం చేసింది. ఇదిలా ఉండగా, శుక్రవారం వాయవ్య పాకిస్థాన్‌లోని లక్కీ మార్వాట్ జిల్లాలో పోలీసు వాహనాన్ని లక్ష్యంగా చేసుకుని రోడ్డుపక్కన బాంబు పేలింది. ఈ ఘటనలో ఆరుగురు పోలీసు సిబ్బంది చనిపోయారని పోలీసు అధికారి సజ్జాద్ ఖాన్ తెలిపారు. దాడికి ఎవరూ బాధ్యత స్వీకరించలేదు. అయితే నిషేధిత సంస్థ ‘తహ్రీక్-ఇ-తాలిబాన్ పాకిస్థాన్ (టిటిపి)’పై అనుమానం వ్యక్తమవుతోంది.

ఇటీవలి పరిణామాలు రెండు దేశాల మధ్య ఉద్రిక్తతను మరింత పెంచాయి. ఈ పరిస్థితిని పాకిస్థాన్ “బహిరంగ యుద్ధం”గా అభివర్ణించింది. మరోవైపు అమెరికా-ఇజ్రాయెల్‌-ఇరాన్ మధ్య కొనసాగుతున్న యుద్ధం నేపథ్యంలో ప్రాంతీయ స్థిరత్వంపై ఆందోళనలు వ్యక్తమవుతున్నాయి. ఆఫ్ఘనిస్తాన్ రక్షణ మంత్రిత్వ శాఖ ప్రకారం, పాకిస్థాన్ దాడులకు ప్రతిగా కోహాట్ జిల్లాలోని పాకిస్థాన్ సైనిక స్థావరాలను లక్ష్యంగా చేసుకుని ప్రతిదాడులు చేపట్టారు. ఈ దాడుల్లో భారీ నష్టం కలిగిందని పేర్కొంది. ఆఫ్ఘనిస్తాన్ ఇంటెలిజెన్స్ విభాగ ప్రతినిధి ఖలీల్ హమ్రాజ్ ఎక్స్‌లో చేసిన పోస్టులో, ఇస్లామాబాద్ సమీపంలోని ఒక సైనిక స్థావరంపై రెండు డ్రోన్లతో దాడి చేశామని తెలిపారు. అయితే పాకిస్థాన్ పోలీసులు ఆ డ్రోన్లను గుర్తించి ఎలక్ట్రానిక్ విధానాలతో కూల్చేశామని చెప్పారు. ఎలాంటి నష్టం జరగలేదని తెలిపారు.

పాకిస్థాన్ సమాచార మంత్రిత్వ శాఖ ప్రకారం, టిటిపి కోహాట్ ప్రాంతంలో మూడు సాధారణ డ్రోన్లను ఉపయోగించి దాడి చేయడానికి ప్రయత్నించింది. పాకిస్థాన్ సైన్యం వాటిని కూల్చేసిందని తెలిపింది. కూలిన అవశేషాలు పడడంతో ఇద్దరు పౌరులు గాయపడ్డారని పేర్కొంది. ముజాహిద్ ప్రకారం, పాకిస్థాన్ దాడులు పక్తియా, పక్తికా ప్రావిన్సుల్లోని పలు పౌర ప్రాంతాలు, ఖాళీ ప్రదేశాలను తాకాయి. “ఈ దాడులకు ప్రతిస్పందన తప్పదని” ఆయన హెచ్చరించారు. కాబూల్ పోలీసు ప్రతినిధి ఖలీద్ జద్రాన్ వివరాల ప్రకారం, నగరంలో జరిగిన దాడుల్లో పిల్లలు సహా కనీసం నలుగురు పౌరులు చనిపోయారు. మరో 15 మంది గాయపడ్డారు. నంగర్‌హార్ ప్రావిన్స్ సమాచార శాఖ తెలిపిన వివరాల ప్రకారం, పాకిస్థాన్ మోర్టార్ షెల్ పేలడంతో ఒక మహిళ, ఒక చిన్నారి చనిపోయారు. ఆఫ్ఘనిస్తాన్ అంతటా మొత్తం మృతుల సంఖ్య స్పష్టంగా తెలియలేదు.

ఫిబ్రవరి చివరి నుంచి ఇరుదేశాలు పరస్పరం సైనిక స్థావరాలను లక్ష్యంగా చేసుకుని దాడులు చేస్తున్నాయి. సరిహద్దు దాడులకు ప్రతిగా తాము పాకిస్థాన్ స్థావరాలను లక్ష్యంగా చేసుకున్నామని కాబూల్ అప్పట్లో ప్రకటించింది. పాకిస్థాన్ మాత్రం తమ చర్యలు టిటిపి ఉగ్రవాదులు, వారి మద్దతు నెట్వర్క్‌లపైనే జరుగుతున్నాయని చెబుతోంది. పాకిస్థాన్ ఆరోపణల ప్రకారం, ఆఫ్ఘనిస్తాన్ తాలిబాన్ ప్రభుత్వం తమపై దాడులు చేసే ఉగ్రవాద గుంపులకు ఆశ్రయం ఇస్తోంది. అంతేకాకుండా తమ ప్రత్యర్థి దేశం భారత్‌తో కూడా సన్నిహితంగా వ్యవహరిస్తోందని పాకిస్థాన్ ఆరోపిస్తోంది. ఈ ఆరోపణలను తాలిబాన్ ప్రభుత్వం ఖండిస్తోంది. ఇటీవలి పోరాటాల్లో ఇరువైపులా భారీ నష్టం జరిగిందని రెండూ ప్రకటిస్తున్నాయి. పాకిస్థాన్ సమాచార మంత్రి అట్టౌల్లా తరార్ ప్రకారం, పోరాటం ప్రారంభమైనప్పటి నుంచి 663 మంది ఆఫ్ఘన్ తాలిబాన్ సభ్యులను తమ సైన్యం హతమార్చింది. దీనిపై కాబూల్ నుంచి వెంటనే స్పందన రాలేదు.

ఈ నేపథ్యంలో చైనా ప్రత్యేక ప్రతినిధి యూయే షియాయోంగ్ గురువారం ఇస్లామాబాద్‌కు చేరుకుని పాకిస్థాన్ ప్రతినిధి మహ్మద్ సాదిక్‌తో చర్చలు జరిపారు. ఉగ్రవాద గుంపుల నుంచి ఉన్న ముప్పుపై చర్చించి, ప్రాంతంలో శాశ్వత శాంతి, స్థిరత్వం కోసం సమిష్టి చర్యలు అవసరమని ఇద్దరూ అభిప్రాయపడ్డారు. అంతర్జాతీయ సమాజం పలుమార్లు శాంతి పాటించాలని కోరినా పరిస్థితిలో పెద్ద మార్పు కనిపించలేదు. పాకిస్థాన్ ప్రకారం, తమ సైనిక చర్యలు ‘ఖవారిజ్’గా పేర్కొనే టిటిపి ఉగ్రవాదులపై మాత్రమే కొనసాగుతాయి. 2021లో తాలిబాన్ మళ్లీ అధికారంలోకి వచ్చిన తర్వాత టిటిపి దాడులు పాకిస్థాన్‌లో, సరిహద్దు ప్రాంతాల్లో పెరిగాయని ఇస్లామాబాద్ చెబుతోంది. టిటిపి సహా ఇతర ఉగ్రవాద గుంపులను అడ్డుకునే స్పష్టమైన చర్యలు కాబూల్ తీసుకునే వరకు తమ సైనిక చర్యలు కొనసాగుతాయని పాకిస్థాన్ తెలిపింది. అక్టోబర్‌లో ఖతార్ మధ్యవర్తిత్వంతో కాల్పుల విరమణ ఒప్పందం కుదిరినా అది ఎక్కువకాలం నిలవలేదు. నవంబర్‌లో టర్కీలో జరిగిన శాంతి చర్చలు కూడా స్థిర ఒప్పందానికి దారి తీయలేదు.