Iran - America War : మధ్యప్రాచ్యంలో కొనసాగుతున్న దాడులు.. చర్చల్లేవ్.. కొనసాగుతున్న యుద్ధం

ఈ యుద్ధంలో ఎవరు ఎక్కువ నష్టాన్ని తట్టుకుంటారనే కోణంలో పరిస్థితులు కనిపిస్తున్నాయి. ఇరాన్ క్షిపణి, అణు కార్యక్రమాలు ముప్పు కాకుండా చూడటం, ప్రాంతీయ సాయుధ గుంపులకు ఇరాన్ మద్దతు నిలిపివేయడం వంటి లక్ష్యాలను అమెరికా ప్రస్తావించింది. ఒక దశలో ఇరాన్ ధార్మిక పాలనను కూల్చాలనే ఆలోచన కూడా వెలుగులోకి వచ్చింది. అమెరికా, ఇజ్రాయెల్ దాడులతో ఇరాన్ సైన్యం, ప్రభుత్వ వ్యవస్థకు భారీ నష్టం కలిగింది. పలువురు కీలక నాయకులు మరణించారు. అనేక లక్ష్యాలపై దాడులు జరిగాయి. అయినప్పటికీ, ఇరాన్ క్షిపణి దాడులు కొనసాగిస్తోంది. ప్రభుత్వంపై తిరుగుబాటు సంకేతాలు కనిపించడం లేదు.

ఇరాన్ దృష్టిలో బతకడమే విజయంగా భావిస్తుంది. తీవ్రమైన దాడులను తట్టుకుని నిలబడటం ఇరాన్ నాయకత్వం విజయంగా భావిస్తోంది. జలసంధిపై నియంత్రణతో ప్రపంచ ఆర్థిక వ్యవస్థలో కల్లోలం సృష్టించి అమెరికాను వెనక్కి తగ్గించాలనే ఆశతో ఉంది. చమురు, సహజ వాయువు రవాణాలో అంతరాయం కలగడంతో ప్రపంచవ్యాప్తంగా ధరలు పెరిగాయి.చర్చల ద్వారా పరిష్కారం లేకపోతే, జలసంధి ద్వారా సరుకుల రవాణా పునరుద్ధరించేందుకు అమెరికా మరింత కఠిన చర్యలకు దిగాల్సి వస్తుంది. ప్రపంచ చమురు, సహజ వాయువు రవాణాలో సుమారు 20 శాతం ఈ జలసంధి ద్వారానే జరుగుతుంది. అమెరికా ప్రతిపాదించిన కాల్పుల విరమణ ప్రతిపాదనను ఇరాన్ తిరస్కరించింది. తన సొంత డిమాండ్లను ముందుకు తెచ్చింది. జలసంధి పూర్తిగా తెరవకపోతే విద్యుత్ కేంద్రాలపై దాడులు చేస్తానని ట్రంప్ హెచ్చరించారు. అయితే చర్చలు సానుకూలంగా సాగుతున్నాయని పేర్కొంటూ ఆ నిర్ణయాన్ని వాయిదా వేశారు. ట్రంప్ ఆ చర్యలకు దిగితే కీలక మౌలిక వసతులపై ప్రతీకార దాడులు చేస్తామని ఇరాన్ హెచ్చరించింది.

గల్ఫ్ సహకార మండలి ప్రకారం, హోర్ముజ్ జలసంధి నుంచి సురక్షితంగా ప్రయాణించేందుకు ఇరాన్ నౌకల నుంచి చెల్లింపులు వసూలు చేస్తోంది. అమెరికా, ఇజ్రాయెల్ యుద్ధ ప్రయత్నాలకు సంబంధం ఉన్నట్లు భావించిన నౌకలను అడ్డుకుంటోంది. కొన్నింటిని మాత్రం అనుమతిస్తోంది. లాయిడ్స్ లిస్ట్ ఇంటెలిజెన్స్ దీనిని ‘టోల్‌బూత్ వ్యవస్థ’గా పేర్కొంది. కనీసం రెండు నౌకలు చైనా కరెన్సీ యువాన్‌లో చెల్లింపులు చేసినట్లు తెలిపింది. యుద్ధం మొదలైన తర్వాత బ్రెంట్ క్రూడ్ చమురు ధరలు 40 శాతం పైగా పెరిగాయి.ఇరాన్ విప్లవ గార్డ్ నౌకాదళ అధిపతి అలీరెజా టాంగ్సిరీ, నౌకాదళ గూఢచారి విభాగ అధికారి బెహ్నామ్ రెజాయిని హతమార్చినట్లు ఇజ్రాయెల్ ప్రకటించింది. జలసంధి గుండా నౌకలను అడ్డుకునే బాంబుదాడులకు టాంగ్సిరీ బాధ్యుడని ఇజ్రాయెల్ రక్షణ మంత్రి ఇజ్రాయెల్ కాట్జ్ తెలిపారు. దీనిపై ఇరాన్ వెంటనే స్పందించలేదు.

పాకిస్థాన్ మధ్యవర్తిత్వంతో అమెరికా 15 అంశాల కార్యాచరణ జాబితాను ఇరాన్‌కు అందించింది. శాంతి ఒప్పందానికి ఇది రూపరేఖలని అమెరికా ప్రతినిధి స్టీవ్ విట్కాఫ్ తెలిపారు. మరణం, విధ్వంసం తప్ప ఇరాన్‌కు ఇతర మార్గం లేదని అర్థమయ్యే పరిస్థితి ఇదేనని చెప్పారు. ట్రంప్ సామాజిక మాధ్యమాల్లో పోస్టు చేస్తూ, యుద్ధం ముగింపుకు చర్చలు ఆలస్యం చేయకూడదని ఇరాన్‌కు హెచ్చరించారు. మరోవైపు, హోర్ముజ్ జలసంధిపై తన సార్వభౌమాధికారాన్ని గుర్తించాలని, నష్టపరిహారం ఇవ్వాలని ఇరాన్ ఐదు అంశాల ప్రతిపాదన పెట్టింది. అయితే, యుద్ధం ముగింపుకు చర్చలు జరపడం లేదని, ఇతర దేశాల ద్వారా వచ్చే సందేశాలు చర్చలు కావని ఇరాన్ విదేశాంగ మంత్రి అబ్బాస్ అరాఘ్చీ పేర్కొన్నారు. ఈజిప్టు కూడా మధ్యవర్తిత్వం చేస్తోంది. ఇరు పక్షాలు శాంతి చర్చలకు ఆసక్తి చూపుతున్నాయని ఈజిప్టు విదేశాంగ మంత్రి బద్ర్ అబ్దెలత్తీ తెలిపారు.

2,500 మెరైన్లతో యుఎస్‌ఎస్ ట్రిపోలీ సహా నౌకలు మధ్యప్రాచ్యానికి చేరువయ్యాయి. 82వ ఎయిర్‌బోర్న్ దళానికి చెందిన కనీసం వెయ్యి మంది పారాచూట్ సైనికులను కూడా పంపారు.ఇజ్రాయెల్ 162వ డివిజన్‌ను దక్షిణ లెబనాన్‌కు తరలించింది. హెజ్బొల్లా దాడుల నుంచి ఉత్తర సరిహద్దు పట్టణాలను రక్షించడమే లక్ష్యమని తెలిపింది. ఇరాన్ సైనిక మౌలిక వసతులపై దాడులు చేసినట్లు ప్రకటించింది. ఇస్ఫహాన్ చుట్టుపక్కల కూడా భారీ దాడులు జరిగాయి. అక్కడ ఇరాన్ వాయుసేన స్థావరం, అణు కేంద్రం ఉన్నాయి.టెహ్రాన్‌లోని కొన్ని ప్రాంతాల్లో విద్యుత్ సరఫరా నిలిచిపోయిందని ప్రత్యక్ష సాక్షులు తెలిపారు. ఇజ్రాయెల్‌పై ఇరాన్ నుంచి క్షిపణి దాడులు కొనసాగాయి. లెబనాన్ నుంచి జరిగిన దాడిలో ఉత్తర తీర నగరం నహారియాలో ఒక వ్యక్తి మృతిచెందాడు. అబుదాబిపై క్షిపణి తిప్పికొట్టే చర్యల్లో ఏర్పడిన శకలాలతో ఇద్దరు మరణించారు.ఇజ్రాయెల్ సైన్యం పూర్తి స్థాయిలో తన బాధ్యతలు నిర్వహించేందుకు మరో 15 వేల మంది సైనికులు అవసరమని ప్రతినిధి ఎఫీ డెఫ్రిన్ తెలిపారు. తరచూ రిజర్వు సైనికులను పిలిపించడం వల్ల అలసట, ఆర్థిక ఇబ్బందులు తలెత్తుతున్నాయని పేర్కొన్నారు.

యుద్ధం ప్రారంభం నుంచి ఇరాన్‌లో 1,900 మందికిపైగా మరణించినట్లు ఆరోగ్య ఉపమంత్రి అలీ జాఫరియన్ తెలిపారు. ఇజ్రాయెల్‌లో 18 మంది మృతి చెందారు. లెబనాన్‌లో ముగ్గురు ఇజ్రాయెల్ సైనికులు మరణించారు. కనీసం 13 మంది అమెరికా సైనికులు ప్రాణాలు కోల్పోయారు.లెబనాన్‌లో 1,100 మందికిపైగా మృతి చెందినట్లు అధికారులు తెలిపారు. ఇరాక్‌లో ఇరాన్ మద్దతు గుంపులు యుద్ధంలో చేరడంతో 80 మంది భద్రతా సిబ్బంది మరణించారు.