అణు కార్యక్రమంపై కీలక సమావేశం నేడు.. ఇరాన్ హెచ్చరికలు

చర్చలు విఫలమైతే ఇరాన్‌పై దాడి చేస్తామని ట్రంప్ పునరుద్ఘాటించారు. దీనిపై మధ్యప్రాచ్య దేశాలు ఆందోళన వ్యక్తం చేస్తున్నాయి. ఇది ప్రాంతీయ యుద్ధానికి దారి తీసే ప్రమాదం ఉందని భయపడుతున్నాయి. క్యూబా సముద్ర జలాల్లో జరిగిన కాల్పుల ఘటనపై అమెరికా విదేశాంగ మంత్రి మాక్రో రుబియో స్పందించారు. బాధితులు అమెరికా పౌరులా లేక శాశ్వత నివాసులా అనే అంశాన్ని తెలుసుకునేందుకు సమాచారం సేకరిస్తున్నామని చెప్పారు. సెయింట్ కిట్స్‌లోని బస్సెటెరే విమానాశ్రయంలో మీడియాతో మాట్లాడుతూ ఘటనపై పూర్తి వివరాలు ఇంకా లభించలేదన్నారు. “ఇలా బహిరంగ సముద్రంలో కాల్పులు జరగడం సాధారణం కాదు” అని వ్యాఖ్యానించారు. క్యూబా అధికారుల సమాచారం ఒక్కటిపైనే ఆధారపడబోమని స్పష్టం చేశారు.

క్యూబా ఉత్తర తీరానికి సమీపంలో ఫ్లోరిడాలో నమోదైన స్పీడ్‌బోట్‌పై కాల్పులు జరిపి నలుగురు మృతిచెందినట్టు క్యూబా ప్రభుత్వం తెలిపింది. అమెరికా పౌరులు ఉన్నారో లేదో స్పష్టత లేదు.ఫ్లోరిడా అటార్నీ జనరల్ జేమ్స్ ఉథ్మేయర్ ఈ ఘటనపై రాష్ట్ర ప్రాసిక్యూటర్లు ఫెడరల్ అధికారులతో కలిసి దర్యాప్తు చేయాలని ఆదేశించారు. మియామీకి చెందిన కాంగ్రెస్ సభ్యుడు కార్లోస్ జిమెనెజ్ ఈ ఘటనను ఖండించారు.వాషింగ్టన్ సమీపంలోని పోటోమాక్ నదిలో భారీగా మురుగు లీక్‌ అయిన ఘటనపై డీసీ వాటర్ అధికారులు కీలక సమాచారం వెల్లడించారు. జనవరిలో పైపులైన్ విరిగిపోవడంతో సుమారు 250 మిలియన్ గ్యాలన్ల మురుగు నదిలో కలిసింది. ఫిబ్రవరి 8 తర్వాత మళ్లీ లీకేజీ జరగలేదని అధికారులు తెలిపారు. మార్చి మధ్య నాటికి పూర్తిగా మరమ్మతులు పూర్తి చేస్తామని చెప్పారు.

ఈ ఘటనపై ట్రంప్ స్థానిక డెమోక్రటిక్ నేతలను తీవ్రంగా విమర్శించారు. “పరిపాలనలో తీవ్ర లోపాలు” ఉన్నాయని ఆరోపించారు. పర్యావరణ పరిరక్షణ సంస్థ (EPA) పర్యవేక్షణలో వ్యవహారం కొనసాగుతోంది. ఉపాధ్యక్షుడు JD Vance మిన్నెసోటా రాష్ట్రానికి సంబంధించిన కొంత మెడికెయిడ్ నిధులను తాత్కాలికంగా నిలిపివేస్తున్నట్టు ప్రకటించారు. ప్రజా నిధుల దుర్వినియోగంపై ఆందోళనల కారణంగా ఈ నిర్ణయం తీసుకున్నామని చెప్పారు. మెడికెయిడ్ పథకం తక్కువ ఆదాయం ఉన్న అమెరికన్లకు ఆరోగ్య భద్రత అందిస్తుంది. దేశవ్యాప్తంగా కోట్లాది మంది ఈ పథకంలో చేరారు.

రష్యా–ఉక్రెయిన్ యుద్ధాన్ని ముగించేందుకు దౌత్య చర్చలే సరైన మార్గమని వాన్స్ తెలిపారు. అమెరికా అధ్యక్షుడు రష్యా అధ్యక్షుడు Vladimir Putin లక్ష్యాలపై స్పష్టత ఉన్నప్పటికీ, చర్చల ద్వారా పరిష్కారం సాధ్యమని చెప్పారు. అదే సమయంలో ఉక్రెయిన్ అధ్యక్షుడు జెలెన్కీ తో ట్రంప్ ఫోన్‌లో మాట్లాడినట్టు వైట్ హౌస్ వర్గాలు వెల్లడించాయి. జెనీవాలో మరో విడత చర్చలు జరగనున్నాయి.వెనిజులా అధ్యక్షుడు నికోలాస్ మదురో అరెస్టు చర్యపై వచ్చిన విమర్శలను రూబియో కొట్టిపారేశారు. గత ఎనిమిది వారాల కంటే ప్రస్తుతం వెనిజులా పరిస్థితి మెరుగ్గా ఉందని చెప్పారు. ఇరాన్ క్షిపణి, డ్రోన్ కార్యక్రమాలకు తోడ్పడుతున్నారని ఆరోపిస్తూ 30 మంది వ్యక్తులు, సంస్థలు, నౌకలపై అమెరికా కొత్త ఆంక్షలు విధించింది. జెనీవాలో జరగనున్న చర్చల ముందు ఈ చర్య తీసుకుంది.ఉపాధ్యక్షుడు వాన్స్ మాట్లాడుతూ, “ఇరాన్‌కు అణ్వాయుధాలు ఉండకూడదు. ఇది స్పష్టమైన లక్ష్యం” అన్నారు. అవసరమైతే సైనిక చర్యకు కూడా వెనుకాడబోమని హెచ్చరించారు.