Israel - America - Iran War : ఇరాన్ పై వరస వైమానిక దాడులు.. ట్రంప్ డెడ్ లైన్ కు ముందే ఎటాక్

ఇరాన్ అధ్యక్షుడు మసూద్ పెజెష్కియన్1.4 కోట్ల మంది స్వచ్ఛందంగా యుద్ధానికి సిద్ధమయ్యారని తెలిపారు. “నేనూ ఇరాన్ కోసం ప్రాణత్యాగానికి సిద్ధమే” అని ఆయన ఎక్స్‌లో పోస్టు చేశారు. ఇరాన్‌కు అమెరికా, ఇజ్రాయెల్ ఆయుధ సాంకేతికత, గగన ఆధిపత్యం సరితూగకపోయినా, జలసంధిపై ఆంక్షలతో ప్రపంచ ఆర్థిక వ్యవస్థకు దెబ్బతీస్తోంది. ఈ స్థితి నుంచి బయటపడాలని ట్రంప్‌పై దేశీయ, అంతర్జాతీయ ఒత్తిడి పెరుగుతోంది.దౌత్య చర్చలు కొనసాగుతున్నాయని అధికారులు చెబుతున్నారు. అయితే తాజా అమెరికా ప్రతిపాదనను ఇరాన్ తిరస్కరించింది. పాకిస్తాన్, ఈజిప్ట్, టర్కీ మధ్యవర్తిత్వంతో రాజీ సాధనకు ప్రయత్నాలు జరుగుతున్నాయని సమాచారం.

“ఒకే రాత్రిలో మొత్తం దేశాన్ని నాశనం చేయగలం” అని ట్రంప్ హెచ్చరించారు. “రేపు అర్ధరాత్రి లోపు ఇరాన్‌లోని ప్రతి వంతెన ధ్వంసమవుతుంది. విద్యుత్ కేంద్రాలు కాలిపోతాయి” అని అన్నారు.దీనికి ప్రతిగా విద్యుత్ కేంద్రాల చుట్టూ యువత మానవ గొలుసులు ఏర్పాటు చేయాలని ఇరాన్ పిలుపునిచ్చింది. “విద్యుత్ కేంద్రాలు జాతీయ ఆస్తులు” అని యువజన మండలి కార్యదర్శి అలిరెజా రహిమీ వీడియో ప్రకటనలో చెప్పారు.ఫ్రాన్స్ విదేశాంగ మంత్రి జీన్-నోయెల్ బారోట్ పౌర మౌలిక సదుపాయాలపై దాడులు అంతర్జాతీయ యుద్ధ చట్టాలకు విరుద్ధమని అన్నారు. ఇలాంటి దాడులు పరిస్థితిని మరింత విషమం చేస్తాయని హెచ్చరించారు.ఐక్యరాజ్యసమితి ప్రధాన కార్యదర్శి ఆంటోనియో గుటెర్రెస్ కూడా పౌర సదుపాయాలపై దాడులు నిషేధమని అమెరికాను హెచ్చరించారు.

టెహ్రాన్ నివాస ప్రాంతాలపై దాడులు జరిగాయి. దాదాపు మూడున్నర డజన్ల మంది మరణించారు. పశ్చిమ ఇరాన్‌లోని ఖోర్రమాబాద్ అంతర్జాతీయ విమానాశ్రయంపై దాడి జరిగింది. అల్బోర్జ్ ప్రావిన్స్‌లో మరో దాడిలో 18 మంది చనిపోయారు.ఇజ్రాయెల్ సైన్యం షిరాజ్‌లోని పెట్రోకెమికల్ కేంద్రాన్ని లక్ష్యంగా చేసుకున్నట్లు తెలిపింది. రైల్వే నెట్‌వర్క్‌పై దాడుల సూచనగా ఫార్సీ భాషలో ప్రజలకు హెచ్చరికలు జారీ చేసింది.ఇరాన్ సౌదీ అరేబియాపై క్షిపణులు ప్రయోగించింది. వాటిని అడ్డుకోవడంతో ఇంధన కేంద్రాల సమీపంలో అవశేషాలు పడ్డాయని అధికారులు తెలిపారు. బహ్రెయిన్‌ను అరేబియా ద్వీపకల్పంతో కలిపే కింగ్ ఫహద్ కాజ్‌వే వంతెనను తాత్కాలికంగా మూసివేశారు. ఇజ్రాయెల్ నగరాలు టెల్ అవీవ్, ఎయిలాత్ వైపు కూడా క్షిపణులు దూసుకెళ్లినట్లు సమాచారం.

ఫిబ్రవరి 28న ప్రారంభమైన యుద్ధం తర్వాత ఇరాన్ హోర్ముజ్ జలసంధిలో నౌకా రవాణాను నిలిపివేసింది. దీని ప్రభావంతో చమురు ధరలు పెరిగాయి. బ్రెంట్ క్రూడ్ బ్యారెల్ ధర 108 డాలర్లకు చేరింది.45 రోజుల కాల్పుల విరమణ ప్రతిపాదనను ఇరాన్ తిరస్కరించింది. ఆంక్షల సడలింపుతో పాటు జలసంధి పునఃప్రారంభంపై చర్చలు కొనసాగుతున్నాయని అధికారులు తెలిపారు.