Cuba : క్యూబాలో భారీ విద్యుత్ అంతరాయం… లక్షలాది మంది చీకట్లో

ఇంధన-గనుల మంత్రి విసెంటే డే లా ఓ లేవీ ఎక్స్‌లో స్పందిస్తూ, ప్రభావిత ప్రాంతాల్లో కీలక సేవలకు విద్యుత్ అందిస్తున్నామని చెప్పారు. రెండు విద్యుత్ కేంద్రాలు మళ్లీ పని చేయడం ప్రారంభించాయని తెలిపారు. ఆసుపత్రులు, వైద్య కేంద్రాలు వంటి అత్యవసర మౌలిక సదుపాయాలకు విద్యుత్ సరఫరా కొనసాగుతోందని చెప్పారు. “క్లిష్టమైన ఇంధన పరిస్థితుల్లో జాతీయ విద్యుత్ వ్యవస్థను పునరుద్ధరించడానికి కృషి చేస్తున్నాం” అని ఆయన పేర్కొన్నారు. అంతరాయాలకు సిద్ధంగా ఉండాలని అమెరికా హెచ్చరిక జారీచేసింది. క్యూబాలోని అమెరికా రాయబార కార్యాలయం ప్రజలకు హెచ్చరిక జారీ చేసింది. పెద్ద అంతరాయాలకు సిద్ధంగా ఉండాలని, ఇంధనం, నీరు, ఆహారం, మొబైల్ ఫోన్ బ్యాటరీలను జాగ్రత్తగా వినియోగించాలని సూచించింది. దేశవ్యాప్తంగా విద్యుత్ వ్యవస్థ నమ్మదగిన స్థితిలో లేదని కూడా పేర్కొంది.

సాయంత్రానికి హవానాలోని సుమారు 2.5 శాతం ప్రాంతాలకు మాత్రమే విద్యుత్ పునరుద్ధరించామని ప్రభుత్వం తెలిపింది. దాదాపు 21,100 వినియోగదారులకు సరఫరా తిరిగి ప్రారంభమైందని పేర్కొంది. వ్యవస్థ అనుమతించిన మేరకు దశలవారీగా విద్యుత్ అందిస్తామని అధికారులు చెప్పారు. ప్రధాన మంత్రి మానుయెల్ మారెరో క్రూస్ ఎక్స్‌లో స్పందిస్తూ, విద్యుత్ కార్మికుల అనుభవం, కృషిపై విశ్వాసం ఉందన్నారు.రాత్రి పడుతున్నా హవానా నగరంలో చాలామంది ఇళ్ల ముందు కూర్చున్నారు. కొందరు కట్టెలు, బొగ్గుతో ‘కాల్డోసాస్’ అనే సూప్ వండి పొరుగువారితో పంచుకున్నారు. నగర సముద్రతీరంలో కొందరు సంగీతకారులు సంగీతం వాయించారు. మరికొందరు రీచార్జ్ బల్బ్ వెలుతురులో డోమినో ఆటలు ఆడారు.“విద్యుత్ లేకపోతే యువతకు వినోదం కోసం ఇదొక్కటే మార్గం” అని జెఫర్సన్ సిల్వేరా అన్నారు. 66 ఏళ్ల జెనోవేవా టోర్రెస్ విద్యుత్ రావాలని ఎదురుచూస్తూ ఉండగా భారీ అంతరాయం గురించి తెలిసి అసహనం వ్యక్తం చేశారు. “ఇంకా ఎంతకాలం ఇలా? మరి భోజనం ఎలా చేస్తాం? మళ్లీ రొట్టెతోనే సరిపెట్టుకోవాలి” అని చెప్పారు.

హవానాకు తూర్పున ఉన్న ఆంటోనియో గిటెరాస్ థర్మోఎలక్ట్రిక్ ప్లాంట్ బాయిలర్‌లో పైప్ పగిలి నీరు లీక్ కావడంతో ఈ సమస్య వచ్చిందని ప్రభుత్వ మీడియా తెలిపింది. లీక్ కారణంగా చిన్న అగ్ని ప్రమాదం జరిగినా పెద్ద నష్టం జరగలేదని అధికారులు చెప్పారు. సాంకేతిక సిబ్బంది ముందుగా లోపాన్ని గుర్తించి మరమ్మతులు చేసిన తర్వాతే యూనిట్ మళ్లీ ప్రారంభిస్తామని ప్లాంట్ టెక్నికల్ డైరెక్టర్ రోమాన్ పెరెజ్ కస్తనేడా తెలిపారు. ఇటీవలి నెలల్లో క్యూబాలో ఇలాంటి అంతరాయాలు పెరిగాయి. పాతబడిన థర్మోఎలక్ట్రిక్ కేంద్రాలు 30 సంవత్సరాలకుపైగా పని చేస్తున్నాయి. అధిక వ్యయంతో నిర్వహణ జరగడం లేదు. అమెరికా ఆంక్షల వల్ల కొత్త పరికరాలు, విడి భాగాలు కొనడం కష్టమైందని అధికారులు చెబుతున్నారు.అదే సమయంలో వెనిజులా నుంచి వచ్చే చమురు సరఫరా కూడా తగ్గింది. దీంతో దేశం ఇంధన కొరతను ఎదుర్కొంటోంది.“ఏ పరిస్థితుల్లోనైనా ముందుకు సాగాల్సిందే. పోరాడటం తప్ప మరో మార్గం లేదు” అని 76 ఏళ్ల ఎర్నెస్టో కౌటో మార్టినెజ్ అన్నారు.