Mon Dec 15 2025 20:25:04 GMT+0000 (Coordinated Universal Time)
క్రీడాలోకంలో విషాదం.. రోడ్డుప్రమాదంలో క్రికెట్ దిగ్గజం ఆండ్రూ సైమండ్స్ మృతి
కారు బోల్తా పడి తీవ్రగాయాలు అవడంతో.. ఆండ్రూ సైమండ్స్ ఘటనా ప్రాంతంలోనే మరణించినట్లు పోలీసులు తెలిపారు. తొలుత పోలీసులు..
క్రీడాలోకంలో మరో విషాదం చోటుచేసుకుంది. ఆస్ట్రేలియా క్రికెట్ దిగ్గజం, మాజీ క్రికెటర్, ఎక్స్ ప్లోజివ్ ఆల్ రౌండర్ ఆండ్రూ సైమండ్స్(46) రోడ్డుప్రమాదంలో మృతి చెందాడు. నిన్న రాత్రి క్వీన్స్ లాండ్ రాష్ట్రంలోని టౌన్స్ విల్లేలో జరిగిన కారుప్రమాదంలో ఆండ్రూ ప్రాణాలు కోల్పోయాడు. ప్రమాద సమయంలో కారులో ఆండ్రూ ఒక్కడే ఉన్నాడు. స్థానికుల సమాచారంతో ఘటనా స్థలానికి వెళ్లిన పోలీసులు.. ఆండ్రూని రక్షించేందుకు ప్రయత్నించారు.
కానీ.. కారు బోల్తా పడి తీవ్రగాయాలు అవడంతో.. ఆండ్రూ సైమండ్స్ ఘటనా ప్రాంతంలోనే మరణించినట్లు పోలీసులు తెలిపారు. తొలుత పోలీసులు అతడిని ఆండ్రూ సైమండ్స్ గా గుర్తించలేకపోయారు. అక్కడికి వెళ్లిన మీడియా సంస్థలు చనిపోయింది ఆండ్రూ సైమండ్స్ అని గుర్తించాయి. ఈ వార్తతో క్రికెట్ లోకంలో విషాద ఛాయలు అలుముకున్నాయి.
ఆండ్రూ సైమండ్స్ అకాల మరణంపై పలువురు క్రికెటర్లు దిగ్భ్రాంతి వ్యక్తం చేశారు. ఆయన ఆత్మకు శాంతి చేకూరాలని కోరుతూ ట్వీట్లు చేశారు. సైమండ్స్ సహచరులైన జాసన్ గిలెస్పీ, ఆడం గిల్క్రిస్ట్, పాకిస్థాన్ మాజీ పేసర్ షోయబ్ అక్తర్ తదితరులు ట్వీట్లతో తమ బాధను పంచుకున్నారు. సైమండ్స్ మృతి చెందాడన్న వార్తను నమ్మలేకపోతున్నామని, తీవ్ర దిగ్భ్రాంతికి గురయ్యామని ఆవేదన వ్యక్తం చేశారు.
ఆండ్రూ సైమండ్స్ మృతితో ఆస్ట్రేలియా క్రికెట్ జట్టులో విషాదం నెలకొంది. ఆండ్రూ తన కెరీర్ లో ఆస్ట్రేలియా జట్టు తరపున 26 టెస్టులు, 198 వన్డే మ్యాచ్ లు ఆడాడు. ఆస్ట్రేలియా జట్టులో ఉన్న ఆల్ రౌండర్లలో ఆండ్రూ ఒకరు. 2003,2007 ప్రపంచకప్ గెలిచిన సమయంలో అతను జట్టులో సభ్యుడిగా ఉన్నాడు. 2008లో సిడ్నీలో భారత్తో జరిగిన న్యూ ఇయర్ టెస్టులో హర్భజన్ సింగ్ను ఉద్దేశించి 'మంకీ' అని సిమండ్స్ పిలవడం క్రికెట్లో పెనుదుమారాన్ని రేపింది.
ఓ సందర్భంలో సైమండ్స్ మాట్లాడుతూ.. మంకీగేట్ కుంభకోణం కారణంగా తాను భారీ మూల్యాన్ని చెల్లించుకోవాల్సి వచ్చిందని, తాగుడుకు అలవాటుపడిపోయానని ఆవేదన వ్యక్తం చేశాడు. ఆ తర్వాత హర్భజన్ సింగ్, సిమండ్స్ ఇద్దరూ కలిసి ఐపీఎల్లో ఆడారు.
Next Story