Hyderabad : ఒకే కుటుంబంలో ఐదుగురు మృతి.. అనుమానాలు ఇవే

ఆర్థిక కష్టాల వల్ల బలవన్మరణం పొందారా? లేక మరే ఇతర కారణాలతో మరణించారా? అన్న కోణంలో దర్యాప్తు చేస్తున్నట్లు పోలీసులు తెలిపారు. ఫుడ్ పాయిజినింగ్ అయిందన్న స్థానికుల ఆరోపణల నేపథ్యంలో ఆ దిశగా కూడా పోలీసులు దర్యాప్తు చేస్తున్నారు. ఒకే కుటుంబానికి చెందిన ఐదుగురు మరణించడంతో ఆ ప్రాంతంలో విషాదఛాయలు అలుముకున్నాయి. కర్ణాటక నుంచి ఉపాధి నిమిత్తం వచ్చి ఇక్కడ విగతజీవులుగా మారడాన్ని స్థానికులు తట్టుకోలేకపోతున్నారు. అందరూ ఒకే కుటుంబానికి చెందిన వారు కావడంతో పలు కోణాల్లో పోలీసులు దర్యాప్తు చేస్తున్నారు.

మృతులు కర్ణాటకలోని గుల్బార్గాకు చెందిన వారిగా గుర్తించారు. గుల్బర్గా జిల్లా సేడం మండలం రంజోలికి చెందిన అరవై ఏళ్ల లక్ష్మయ్య, యాభై ఐదేళ్ల వెంకటమ్మ, ముప్ఫయి రెండేళ్ల అనిల్, ఇరవై నాలుగేళ్ల కవితతో పాటు మరొక చిన్నారి కూడా ఉన్నారు. వీరంతా ఉపాధికోసం వచ్చి కూలీ పనులు చేసుకంటూ జీవనం సాగిస్తున్నారు. ఈ ప్రాంతంలో అద్దెకు దిగి ఈరోజు ఆ ఇంటిని ఖాళీ చేయాల్సి ఉందని కూడా స్థానికులు అంటున్నారు. పోలీసులు మాత్రం అన్ని కోణాల్లో దర్యాప్తు చేయాలని నిర్ణయించారు. మృతదేహాలను పోస్టు మార్టం నిమిత్తం ఆసుపత్రికి తరలించి కేసు నమోదు చేసుకుని దర్యాప్తు చేస్తున్నారు.