Sigachi Industry Accident : పది మంది జాడ ఇక కష్టమేనా? ఆశలు వదులుకోవాల్సిందేనా?

ఇక పది మంది కార్మికుల ఆచూకీ లభ్యం కావడం కష్టమేనని సహాయక బృందాలు కూడా అంచనాకు వచ్చాయి. మరొకవైపు కార్మికుల కుటుంబాలు మాత్రం అక్కడే ఉండి తమ వారి జాడ కోసం వేచిచూస్తున్నారు. ఒక దశలో అక్కడి సిబ్బందిపై ఆగ్రహంతో తమ వారు ఎక్కడ అని ప్రశ్నిస్తున్నారు. మంత్రులను కూడా వదిలిపెట్టకుండా నిలదీస్తున్నారు. ఫొటోలను చూపిస్తూ అక్కడ వారిని ఆచూకీ కోసం అడుగుతుండటం మనసును కలచివేస్తుంది. అలాగే ఇంకొందరు కోటి రూపాయల నష్ట పరిహారం ప్రకటించిన వెంటనే కార్మికుల బంధువల మంటూ కొందరు దొంగ ఏడుపులు కూడా ఏడుస్తున్నారు.

సిగాచీ పరిశ్రమలో ప్రమాదం జరిగిన సమయంలో మొత్తం 143 మంది కార్మికులు విధుల్లో ఉన్నారని యాజమాన్యమే చెబుతుంది. అందులో అరవై మంది సురక్షితంగా ప్రమాదం నుంచి బయటపడ్డారు. మరో 35 మంది ఆసుపత్రుల్లో చికిత్స పొందుతుండగా వారిలో కొందరి పరిస్థితి విషమంగా ఉందని వైద్యులు చెబుతున్నారు. మరో 38 మంది వరకూ మరణించినట్లు ఇప్పటికి అధికారులు తేల్చారు. మార్చురీలో గుర్తించని మృతదేహాల కంటే ఆచూకీ తెలియని వారి సంఖ్య ఎక్కువగా ఉంది. అయితే బంధువులకు సమాధానం చెప్పలేక అధికారులు కూడా ఒక దశలో విసుక్కుంటున్నారు. మార్చురీ, ఆసుపత్రిలో లేకపోతే ఇక దొరకడం కష్టమేనని అంటున్నారు. ఇప్పటి వరకూ 31 మృతదేహాలను మాత్రమే గుర్తించారు. ఇంకా పరిశ్రమ వద్ద కార్మికుల బంధువుల రోదనలు మిన్నంటుతూనే ఉన్నాయి.