Weather Report : మరో నాలుగు రోజులు కుండపోతేనట.. అవసరమైతే తప్ప బయటకు రాకండి

భారీ వర్షాలతో పాటు పిడుగులు పడే అవకాశముందని కూడా తెలిపింది. ఈదురుగాలుల తీవ్రత కూడా ఎక్కువగా ఉంటుందని చెప్పింది. ఉరుములు, మెరుపులతో కూడిన వర్షాలు పడతాయని వాతావరణ శాఖ చేసిన హెచ్చరికతో రైతులు ఆందోళన వ్యక్తం చేస్తున్నారు. నిన్న కురిసిన వానకు పంటలు తీవ్రంగా నష్టపోయారు. అకాల వర్షాలు తమకు తీవ్రమైన నష్టాన్ని చేకూర్చిపెట్టాయని రైతులు ఆందోళన చెందుతున్నారు. భూపాలపల్లి, ములుగు, కొత్తగూడెం, ఖమ్మం, నల్గొండ, సూర్యాపేట, మహబూబాబాద్‌, వరంగల్‌, హన్మకొండ, జనగాం, సిద్ధిపేట, భువనగిరి, రంగారెడ్డి, హైదరాబాద్‌, మల్కాజ్‌గిరి, వికారాబాద్‌, సంగారెడ్డి, మహబూబనగర్‌, నాగర్‌ కర్నూల్‌, వనపర్తి, నారాయణపేట, జోగులాంబ గద్వాల జిల్లాల్లో ఈరోజు వర్షాలు పడతాయని వాతావరణ శాఖ తెలిపింది.

వర్షాలు కురుస్తాయన్న హెచ్చరికలో జీహెచ్ఎంసీ అధికారులు కూడా అప్రమత్తమయ్యారు. మ్యాన్ హోల్స్ వద్ద బోర్డులు ఉంచాలని నిర్ణయించారు. అత్యవసరం అయితే తప్ప బయటకు రావద్దని కూడా నిన్న హెచ్చరికలు జారీ చేసిన సంగతి తెలిసిందే. కుండపోత వర్షం కురిసిన తర్వాత గంట సేపు రోడ్లపైకి రావద్దని కూడా పోలీసులు సూచిస్తున్నారు. ట్రాఫిక్ సమస్యలు తలెత్తకుండా ఉండేందుకు సాఫ్ట్్్ వేర్ కంపెనీలు విడతల వారీగా విధుల నుంచి వస్తే మంచిదన్న సూచనలు కూడా పోలీసుల నుంచి వినిపిస్తున్నాయి. ఒక్కసారిగా రోడ్లపైకి వస్తే ట్రాఫిక్ సమస్యలు ఏర్పడతాయని పోలీసులు అంటున్నారు. ప్రజలు కూడా తమకు సహకరించాలని కోరుతున్నారు. ఎవరూ వర్షం వచ్చిన గంట సేపు రోడ్లపైకి రావద్దని, నీరంతా రోడ్లపై నుంచి వెళ్లిపోయిన తర్వాత వస్తేనే ట్రాఫిక్ సజావుగా ఉంటుందని చెబుతున్నారు.