Hyderabad : రెండు గంటలు ఎక్కడున్న వాళ్లు అక్కడే ఉండండి.. హైదరాబాద్ లో భారీ వర్షం

హైదరాబాద్ లో మళ్లీ భారీ వర్షం పడుతుంది. మరో రెండు గంటలు ఎవరూ బయటకు రావద్దని జీహెచ్ఎంసీ అధికారులు తెలిపారు. మళ్లీ ఈరోజు సాయంత్రం కూడా క్లౌడ్ బరస్ట్ జరిగిందని అధికారులు చెబుతున్నారు. మధ్యాహ్నం వరకూ భారీగా ఉష్ణోగ్రతలు నమోదయి, ఒక్కసారిగా మేఘాలు కమ్ముకుని కుండపోత వర్షం మొదలయింది. దంచి కొడుతున్న వర్షంతో నగరవాసుల్లో దడ మొదలయింది. ఆఫీసుల్లో ఉన్న వారు మరో రెండు గంటల పాటు ఆఫీసుల్లోనే ఉండాలని అధికారులు తెలిపారు. హైదరాబాద్ కు ఆరెంజ్ అలెర్ట్ జారీ చేశారు. నిమిష నిమిషానికి వర్షపాతం పెరుగుతుండటంతో ఎవరూ బయటకు రావద్దంటూ అధికారులు ప్రజలను కోరుతున్నారు. క్యుమలోనింబస్ మేఘాలతో భారీ వర్షం కురుస్తుందని వాతావరణ శాఖ అధికారులు తెలిపారు.