Hyderabad : హైదరాబాద్ లో కర్ఫ్యూ వాతావరణం.. బోసిపోయిన వీధులు

ఆదివారం నాడు ఆటవిడుపు. ఎక్కువ మంది తమ కుటుంబ సభ్యులతో కలిసి సొంత వాహనాల్లో బయటకు వస్తారు. వారంలో ఆరు రోజులు విధులు నిర్వహించి సెలవు రోజు కాస్త ఆటవిడుపుగా పార్కులు, దర్శనీయ స్థలాలను సందర్శించడం పరిపాటిగా మారింది. అందుకే ఆదివారం కూడా హైదరాబాద్ లో రద్దీ తగ్గదు. సొంత వాహనాలన్నీ బయటకు రావడంతో ట్రాఫిక్ ఎప్పటి లాగానే ఉంటుంది. ఇక భోజన ప్రియులు తమకు ఇష్టమైన ఆహారాన్ని తినేందుకు బయటకు వచ్చి హోటళ్లను ఆశ్రయిస్తారు. కానీ నేడు భారత్ - న్యూజిలాండ్ మ్యాచ్ జరుగుతుండటంతో ఇక కుటుంబ సభ్యులతో కలసి బయటకు రావడానికి కూడా ఎక్కువ మంది ఇష్టపడటం లేదు.

మధ్యాహ్నం నుంచి హైదరాబాద్ నగరం నిర్మానుష్యంగా మారనుంది. పాకిస్థాన్ తో భారత్ ఆడిన మ్యాచ్ ఆదివారం నాడు జరగడంతో ఆరోజు కూడా ఇలాంటి పరిస్థితి ఉంది. ఇప్పుడు ఫైనల్స్ కావడంతో ఇదే పరిస్థితి ఈ సండే కూడా ఉండవచ్చన్న అంచనా ఉంది. దీంతో పాటు హైదరాబాద్ లోని పలు రెస్టారెంట్లు, బార్లు కస్టమర్లను ఆకట్టుకునేందుకు ఫైనల్ మ్యాచ్ ను తమ వద్దనే చూసేందుకు పెద్ద పెద్ద స్క్రీన్లను ఏర్పాటు చేశారు. కొందరు స్నేహితులతో కలసి రెస్టారెంట్లకకు వెళ్లే అవకాశముంది. మొత్తం మీద మధ్యాహ్నం ఒంటి గంట నుంచే హైదరాబాద్ నగరంలో వీధులు బోసి పోయి కనిపిస్తాయన్నది వాస్తవం. అత్యవసర పరిస్థితులతో బయటకు వచ్చే వారు, క్రికెట్ అంటే ఇష్టం లేని వారు మాత్రమే బయట నేడు కనిపించనున్నారు.