భారీ వర్షాలు.. కళ్లకు పెను ముప్పు

తేమతో కూడిన వాతావరణం, భారీ వర్షపాతం కారణంగా ఢిల్లీలో ఇన్ఫెక్షన్ కేసులు చాలా పెరుగుతూ ఉన్నాయి. అంటువ్యాధి కావడంతో ఇది ప్రబలకుండా తగిన జాగ్రత్తలు తీసుకోవాలని వైద్యులు ప్రజలకు సూచించారు. పరిశుభ్రత ముఖ్యమని.. కళ్లను తాకే విషయంలో కూడా జాగ్రత్తలు తీసుకోవాలని ప్రజలను కోరారు. కంటి ఇన్ఫెక్షన్ల కేసులు పెరుగుతున్న నేపథ్యంలో అన్ని పాఠశాలలను జూలై 29 వరకు (8వ తరగతి పిల్లల వరకూ) మూసివేసినట్లు డిప్యూటీ కమిషనర్ కార్యాలయం సోమవారం అధికారిక ప్రకటనలో తెలిపింది. డిఎస్‌యు, ఐసిసి బృందం ఐదు రోజుల పాటు సర్వే నిర్వహించి ఈ నిర్ణయం తీసుకున్నట్లు సర్క్యులర్‌లో పేర్కొంది. కండ్లకలక కేసులు పెరుగుతూ ఉండడంతో.. వ్యాప్తిని అడ్డుకోడానికి సెలవు ప్రకటించాలని ప్రభుత్వం నిర్ణయించింది. గుజరాత్ రాష్ట్రంలో కూడా ఈ ఇన్ఫెక్షన్స్ వ్యాప్తి కొనసాగుతూ ఉంది. వడోదరలో కూడా అందుకు సంబంధించిన కేసులు పెరిగాయి. ఇన్ఫెక్షన్ అన్ని వయసుల వారికి వ్యాపించింది. దీంతో అధికారులు అప్రమత్తమయ్యారు. ఆంధ్రప్రదేశ్ రాష్ట్రంలోని విశాఖ జిల్లాలో కూడా కండ్ల కలక కేసులు పెరుగుతున్నాయని అంటున్నారు నిపుణులు.