Diwali : దీపావళిని చూడాలంటే అక్కడకు వెళ్లాల్సిందే

ఆంధ్రప్రదేశ్ లోని శ్రీకాకుళం జిల్లా గార మండలంలో దీపావళి గ్రామం ఉంది. అయితే ఈ ఊరికి దీపావళి అనే పేరు పెట్టడానికి చరిత్ర కూడా ఉందంటారు గ్రామస్థులు. శ్రీకాకుళం ప్రాంతాన్ని పరిపాలించిన రాజు ఈ గ్రామానికి దీపావళి అనే నామకరణం చేసినట్లు చరిత్ర చెబుతోంది. సిక్కోలు రాజు గుర్రంపై అటుగా వెళ్లేటప్పుడు ఎండకు తాళలేక ఆ గ్రామ సమీపంలోని కొబ్బరితోటలో స్పృహతప్పి పడిపోయాడట. వెంటనే అక్కడ కూలీలు ఆయనను చూసి ఆయనకు ప్రాధమిక చికిత్స అందించారు. ఆయన తేరుకుని వారిని అభినందించారు. అదే రోజు దీపావళి కావడంతో ఆ గ్రామానికి ఆ రాజు దీపావళిగా నామకరణం చేసినట్లు పెద్దలు చెబుతారు. అప్పటి నుంచి ఆ గ్రామానికి దీపావళిగా పేరు స్థిరపడిపోయింది.

రెవెన్యూ రికార్డుల్లోనూ ఈ గ్రామం పేరు దీపావళిగానే ఉంది. గార మండలం కొంటి పంచాయతీ పరిధిలో ఉన్న ఈ దీపావళి గ్రామంలో దాదాపు వెయ్యి నుంచి పదిహేను వందల మంది వరకూ జనాభా ఉంటారు. అయితే దీపావళి పండగ పేరును తమ గ్రామానికి రావడం పట్ల గ్రామ ప్రజలు గొప్పగా చెప్పుకుంటారు. ఈ తరం యువత కూడా దీపావళి గ్రామానికి వచ్చి పండగను జరుపుకోవడం సంప్రదాయంగా వస్తుంది. ఎక్కడెక్కడో ఉన్న వారు దీపావళికి దీపావళికి చేరుకుని కుటుంబ సభ్యులతో గడుపుతారు. ఈ గ్రామంలో మూడు నుంచి నాలుగు వందల వందల ఇళ్లున్నాయి. అందుకే దీపావళి అంటే ఇక్కడ పండగ మాత్రమే కాదు.. ఊరు కూడా ఈరోజు వెలిగిపోతుంది.